quarta-feira, 21 de fevereiro de 2018

Embaixadora EUA Ko’alia Kooperasaun Nasaun Rua ho Xefe Estadu


DILI, (TATOLI) — Embaixadora Estadus Unidus Amerika (EUA), Kathleen M. Fitzpatrick, hala’o reniuan dahuluk ho Prezidente Repúblika, Francisco Guterres Lú Olo, dezde hahú nia kna’ar iha Timor Leste, 17 Janeiru liuba.

Kathleen M. Fitzpatrick senti kontenti no onrada, hala’o reniuan ho Xefe-de-Estadu hodi ko’alia kona-ba kooperasaun oi-oin entre Timor-Leste no Estadus Unidus Amerika ne’ebé la’o ona iha tempu naruk.

“EUA apoiu ona Timor-Leste molok Timor-Leste hetan nia independénsia to’o agora. Sei fó nafatin nia apoiu liuhusi serbisu sira hanesan Peace corps, USAID, Forsa Naval no prezensa hosi ajénsia oi-oin Estadus Unidus nian iha Timor-Leste,” Kathleen dehan asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e.

Embaixadora ne’e mós relata ba Xefe Estadu kona-ba vizita Konsellu Administrasaun programa Governu Estadus Unidus, Millennium Challenge Corporation (MCC), ne’ebé halo ona parseria ho Timor-Leste liuhusi programa Compact MCC.

Programa ne’e rasik nia objetivu maka atu estimula kresimentu ekonómiku no hamenus ki’ak.

Jornalista: Xisto Freitas | Editór: Manuel Pinto

Imajen: Embaixadora Estadus Unidus Amerika (EUA), Kathleen M. Fitzpatrick, hala’o reniuan dahuluk ho Prezidente Repúblika, Francisco Guterres Lú Olo. Imajen Mídia Palásiu PR.

Sem comentários: