L4 Fila Hikas Mai Timor ho Saudável

DILI, (TATOLI) - Sekretáriu Estadu Veteranus, André da Costa Belo “L4”, fila hikas ona mai Timor-Leste ho kondisaun saudável, hafoin evakua ba ospitál privada Elizabeth Singapura tanba moras komplikadu.

L4 to´o iha Aeruportu Internasionál Nicolau Lobato, Comoro, Dili, sábadu ne´e (13/01), ho aviaun Silk Air hafoin besik fulan tolu (22 Novembru 2017-12 Janeiru 2018) halo tratamentu saúde iha ospitál refere.

“Ha´u fila hikas mai Timor ho orgullu tanba ha´u nia saúde rekopera ona. Lori família nia naran ha´u hato´o agradesementu ba Prezidente Repúblika, Primeiru Ministru, membru Governu sira liu-liu Ministru no Vise Ministru Saúde, Ministra Solidariedade Sosiál, Jenerál F-FDTL, Brigadeiru Jenerál, Komandante PNTL, Komisaun Omenajen no sira seluk ne´ebé durante ne´e preokupa ba ha´u nia saúde,” L4 hato´o sentimentu orgullu ne´e ba jornalista sira liuhusi konferénsia ba imprensa iha salaun VIP Aeruportu Internasionál Comoro.

Nia dehan, iha segunda semana oin, nia sei hakat ba Gabinete Primeiru Ministru hodi hato´o ninia agradesementu no prezensa iha Timor no hafoin ne´e nia bele hahú fali ninia kna´ar nu´udar Sekretáriu Estadu Veteranus.

“Ha´u sei ba aprezenta ha´u nia án ba Primeiru Ministru tanba fulan rua resin ne´e ha´u iha ospitál de´it hodi haree loos maka doutór, infermeiru, daun no aimoruk,” nia espresa ho matan-wen.

Veteranu ne´e informa katak ninia saúde kuaze pursentu atus ida (100%) rekoperadu maibé presiza halo check up pelumenus fulan neen dala ida. Antes ne´e, L4 infrenta moras komplikadu hanesan diabetes (ran midar), rings, infesaun da´et to´o ulun moras no moras sira seluk tan.

L4 nia tratamentu saúde durante iha Singapura inklui viajen finansia hosi Governu. To´o iha aeruportu, L4 simu hosi família, veteranu balun, xefe gabinete, asesór no funsionáriu sira hosi Sekretaria Estadu asuntu Veteranus. 

Jornalista: Xisto Freitas

Imajen: 1 - Sekretáriu Estadu Veteranus, André da Costa Belo “L4” to´o iha Aeruportu Internasionál Comoro, sábadu lorokraik ne´e. Imajen Ajénsia TATOLI/Xisto Freitas.  2 - Sekretáriu Estadu Veteranus, André da Costa Belo “L4” hamutuk ho família iha salaun VIP Aeruportu Internasionál Comoro. Imajen Ajénsia TATOLI/Xisto Freitas.