SIK Investiga Ona Ema Nain Tolu Ne’ebé Fasilita Tiago Guerra

DILI, (TATOLI) – Polísia Nasionál Timor-Leste (PNTL) liuhosi Servisu Investigasaun Kriminál (SIK) halo ona investigasaun ba suspeitu nain tolu ne’ebé fasilita kazal portugés Tiago Luis Guerra ho nia kaben Fong Fong Guerra sai hosi Timor ho ró ba Darwin Austrália.

“Kazu ne’e iha ona Ministériu Públiku, enkuantu ita hein desizaun hosi tribunál atu prosesa sira tuir lei”, hateten Komandante Jerál PNTL, Júlio da Costa Hornai, ba jornalista sira iha Kuarter Jerál Kaikoli, Segunda (11/12).

Tuir informasaun ne’ebé Tatoli asesu, investigasaun ne’e bazeia ba mandadu kapturasaun hosi tribunál tanba diskunfia suspeitu sira komete krime favoresimentu pesoál no falsifikasaun dokumentu públiku.

Suspeitu sira ne’ebé aprejenta ona ba ministériu públiku mak Diretór Corais Timor nu’udar ró nain,  Natalino Evangelista da Silva Faria, kapitaun ró, Malaquias Tefer da Silva Faria, inkui kapitaun ró sidadaun portugés, David Damião Justinho.

Tuir fonte Tatoli nian katak identifikasaun no espesifikasaun ró nain rejistu kompañia individuál no fatura Bounty LNCDRMR 32 Timor-Leste, númeru rejistu LNCDRMR. 00024.08.17 ho tipu lisensa peska desportiva, mergullu rekreativa koletiva.

Dadus seluk relata, iha loron 6 fulan-novembru 2017, David Damião Justino ho Malaquias Tefer da Silva Faria dada ró ho kareta Justino nian ho númeru matrikula 17-282 TL, modelu pick up hosi Dili ba Same Betano hodi fasilita Tiago Guerra ho Fong Fong Guerra sai hosi Timor ba Darwin Austrália.

Tiago Guerra ho nia kaben nu’udar kondenadu hosi tribunál distansia dahuluk ba kazu brankamentu kapitál.

Jornalista: Zezito Silva | Editora: Rita Almeida

Imajen: Komandante Jerál PNTL, Júlio da Costa Hornai