Xanana halo deklarasaun iha rai liur, PM Alkatiri: “Ha’u lakohi responde”

Primeiru Ministru (PM) nudar mos Sekretariu Jeral partidu FRETILIN, Mari Alkatiri, lakohi atu responde ba deklarasaun ne’ebe mak lideransa masimu Aliansa Maioria Parlamentar (AMP) sira halo iha Singapura, Domingu, foin lalais ne’e.

Prezidenti partidu CNRT, Kayrala Xanana Gusmão, hasoru malu ho prezidenti PLP, Taur Matan Ruak no mos Konseleiru masimu partidu KHUNTO, José dos Santos “Naimori Bucar”, iha Singapura, hodi lejitima ejistensia AMP nian no mos halo mensajen paz ba povu Timor Leste atu moris hakmatek.

Liu husi deklarasaun konjunta ne’ebe afirma husi Kayrala Xanana Gusmão ne’e hato’o mos sira nia apresiasaun ba desizaun Prezidenti Republika (PR), Francisco Guterres “Lú Olo” kona-ba lejitimidade VII Governu Konstitusional no reafirama mos katak, nudar lideransa politika, sira sempre prontu kontirbui ba interese nasional.

“Relasiona ho deklarasaun Prezidenti CNRT Xanana Gusmão nian kona-ba situasaun politika iha rai laran, ha’u la responde deklarasaun ne’e tanba Prezidenti partidu CNRT hala’o fila fali konferensia iha rai liur,” afirma Primeiru Ministru Mari Alkatiri, hodi responde jornalista sira iha Hospital Nacional Guido Valadares (HNGV),  Kuarta (22/11/2017).

Alkatiri lia tun dehan, wainhira prezidenti partidu CNRT, Kayrala Xanana Gusmão hamutuk ho Taur Matan Ruak no José Naimori Bucar, halo deklarasaun iha rai laran karik, nia bele responde ho posivel tomak, maibe halo fali iha rai liur (Singapura-<strong><em>red</em></strong>) maka la bele duni atu responde.

Iha konferensia lideransa AMP nian ne’e,  Xanana hamutuk ho nia “alin” Taur Matan Ruak ho José Naimori Bucar deklara mos katak, AMP ne’ebe involve CNRT,  PLP ho KHUNTO  prontu atu responde ba situasaun sira ne’ebe karik sei mosu.

Tuir xefi Governu,  se wainhira presidente partidu CNRT, Partidu PLP ho KHUNTO hasai deklarasaun  iha Rai laran karik, iha posiblidade atu bele responsta. ety

GMN – Grupo Média Nacional