Reitór UNTL: Kualidade Ne’e Prosesu Ida

DILI, (TATOLI) - Reitór Francisco Miguel Martins akresenta iha Ministériu Finansa (MF), Ai-tarak laran, Díli, Kuarta (22/11) katak UNTL (Universidade Nasionál Timor Lorosa’e) serbisu hela ba kualidade, maibé kualidade ne’e prosesu ida, prosesu ida ne’ebé mak nunka hotu.

“Kualidade ensinu superiór ne’e relativa,” hateten reitór UNTL, Francisco Miguel Martins, iha semináriu kona-ba ensinu superiór no empregu, organiza husi Ministériu Edukasaun no Kultura (MEK) ne’ebé hala’o ho objetivu katak eleva kualidade edukasaun ensinu superiór nu’udar fatór xave ba aumenta empregabilidade graduadu sira nian.

Tanba ne’e, tuir reitór ne’e, nu’udar ezemplu UNTL halo investimentu ba kualidade profesór sira nian maske iha doutoramentu pursentu lima no mestradu pursentu 95 iha área oi-oin.

“Ita sei presiza tan forma dotór espesialista sira husi área oi-oin hodi eleva kualidade,” nia realsa.

Reitór universidade públika ne’e reforsa, Kualidade ne’e prosesu ida. Kualidade ne’e sei la monu husi lalehan, moris husi rai-laran mai, prosesu ida ne’ebé mak bele eleva sempre no kontinua bainhira presiza liuhusi kontribuisaun barak, fasilidade barak.

Entretantu, iha abertura semináriu ne’e, Primeiru-ministru, Marí Alkatiri iha nia intervensaun hateten katak Timo-Leste presiza hadi’a sistema edukasaun.

Notísia relevante; http://www.tatoli.tl/2017/11/tl-presiza-hadia-sistema-edukasaun/

Jornalista: Rafy Belo | Editór: Manuel Pinto

Foto: Reitór Universidade Nasionál Timor-Lorosa´e (UNTL), Francisco Miguel Martins.