- TIMOR AGORA: Polítiku Na’in sira tenke Hases hosi Deklarasaun ne’ebé Pániku

quinta-feira, 23 de novembro de 2017

Polítiku Na’in sira tenke Hases hosi Deklarasaun ne’ebé Pániku

Hodi kalan (loron 22 Novemberu) Menistru Defeza-Seguransa José Sequeira "Somotxo" deklara katak, "karik iha problema ruma mosu iha nasaun ne’e, militar ho polísia sei lahalo intervesaun, hodi nune’e membru parlamentu nain 35 hosi oposizaun bele atende”. Ho tristeza boot estetmentu ida ne’e kria pániku tebtebes katak Institusaun Seguransa sei lahalo sira nia responsabilidade ba seguransa atu proteze povu iha Timor-Leste. Estetmentu ida ne’e liga ba membru parlementu nain 35 hosi AMP ne’ebé iha bloku oposizaun nia responsabilidade kona-bá seguransa ba iha públiku, tamba membru legislador sira ne’e lasimu programa governu.

Fundasaun Mahein (FM) hato’o ho lian maka’as katak estetmentu hirak ne’e hatudu laiha responsabilidade no husu atu forsa seguransa tenke halo nia kna’ar atu mantein seguransa públiku ba tempu tomak.

FM triste tebes rona Ministru Defeza ho Seguransa ko’alia katak asuntu seguransa ba povu bele sai negosiu/bargaining ne’ebé bele utuliza iha partidu polítiku laran. Estetmentu hanesan ne’e risku tebes no hamosu pániku públiku, no iha biban bele hamosu komfilitu ne’ebé bele akontese. Ministru lolós tenke haforsa prontudaun hosi autór seguransa nia atu fó proteza ba povu iha oras 24 nia laran iha loron ida.

Husu para polítiku sira labele aplika manobra polítiku maka maka’as liu, lideransa Timor oan tenke buka solusaun ne’ebé orienta ba interese nasional. Hanoin katak seguransa seguru ne’e sai hanesan parte ida importante ba sidadaun sira, polítiku nain sira persiza buka meius atu kontinua hakmatek, hodi buka aprosimasaun ne’ebé simplis, akomodativu no fó esperansa diak atu bele fó solusaun ba tensaun polítika ne’ebé la’o daudaun no halo promosaun ba harmonizasaun entre komunidade.

Polítiku sira iha Timor-Leste tenke estuda hosi resistensia ba ukun rasik an durante tinan 24 liu ba. Iha momentu ne’ebá FALINTIL luta ba objetivu atu liberta patria la’ós ba interese partidaria. Sira sakrifika an ba ukun rasik an no laiha salariu, no hasoru dezafiu barak ho oin-oin tamba ba povu tomak nia diak. Lideransa polítiku sira agora tenke banati tuir sakrifika an ne’ebé hatudu iha resistensia no fó perioridade ba povu nia prosperidade as liu ambisaun pesoal.

Atu bele kria opiniaun públiku ida ne’ebé produktivu, FM husu ba autór polítika sira hotu atu bele kria estementu ne’ebé mak orenta ba paz ho responsabilidade no mos foka ba interese nasional. Lideransa polítiku sira tenke hatene katak sira nia estetmentu fó suporta no halo promosaun ba kria hakmatek no la’ós pániku públiku, ne’e sorin ida. Iha sorin seluk, FM husu mos ba mídia sira atu labele haboot demais notísia ida ne’e. Titlu dahuluk ne’ebé laiha responsabilidade diak hanesan " karik mosu problema, F-FDTL ho PNTL sei halo Intervensaun" ezezerasaun ba notísias ne’e bele fó biban boot katak autór seguransa ne’e hakruk no implementa ona estetmentu hosi Ministru Defeza no Seguransa nia ne’e. ba povu bain-bain husu atu kontinua nafatin kalma no labele haboot rumores ne’ebé nakonu ho tauk. Ikus liu, FM husu ba Institusaun Seguransa fó prioridade ba interese povu tuir mandatu konstitusaun. Nasaun nia diak tenke tau as liu hotu hosi agenda partidaria nia.

Data, 23 Novembru 2017