Hong Long Fisheries, Lda: Krime Transnasional Halo Infiltrasaun Iha Timor –Leste

Komunikadu Imprensa

Hong Long Fisheries, Lda:

Krime Transnasional Halo Infiltrasaun Iha Timor –Leste

Iha inisiu tinan 2017, Fundasaun Mahein (FM) relata ona atividade peska husi Hong Long Fisheries, Lda ne’ebé kaer espesie sira protejidu hanesan Tubaraun. Hong Long Fisheries, Lda hanesan empreza Xineze ida ne’ebé hetan lisensa peska husi Ministériu Agrikultura no Peska iha tinan 2016. Liu deit fulan tolu atividade peska husi empreza ida ne’e nian sai polêmika boot iha sosiedade Timor-Leste tamba kaer espesie sira protejidu tuir lei Timor-Leste nian hanesan temi daudauk iha leten ne’e. Governu Timor-Leste hola medida imediatamente ba prátika ne’e no kria ekipa konjunta ida hodi halo investigasaun hasoru Hong Long Fisheries, Lda. Rezultadu husi investigasaun ne’e la fó sai públiku no la iha transparansia ba prosesu sira hasoru empreza refere. La kleur deit Hong Long Fisheries, Lda fila fali ba tasi-mane hodi halo atividade peska no la kleur deit mos komete kazu ne’ebé hanesan kaer espesie Tubaraun ho tonelada 225 husi ró 15 Hong Long Fisheries, Lda nian.  

Parte oin-oin iha Timor-Leste reazen maka’as ba prátika ne’e no halo ona investigasaun hasoru Hong Long Fisheries, Lda no hetan kobertura ida ne’ebé intensivu husi media nasional no internasional sira. Investigasaun la’o tiha ona no atividade ró peska husi Hong Long Fisheries, Lda daudaun ne’e suspende hela. Maibé to’o agora seidauk iha desizaun final ba kazu ne’e.

Hetok sai polêmika liu kona-bá sé maka na’in lólos ba empreza Hong Long Fisheries, Lda. Dokumentu ka lisensa peska ba Hong Long Fisheries, Lda naklekar iha media sosial konfirma faktu kontroversial ida no alega katak iha buat ruma ne’ebé bele deskonfia antes no durante Hong Long Fisheries, Lda hetan lisensa peska nian. To’o agora seidauk iha informasaun ofisial ruma hodi hato’o katak na’in lólos ba empreza refere. Maske ema hotu hatene katak empreza refere husi Xina.

Relatóriu FM nia deskobre katak empreza Hong Long Fisheries, Lda nia estatutu hanesan ró peska estranjeiru maibé faktu interesante ida ne’ebé FM hetan katak na’in ba empreze refere ema sidadaun nasional ka Timor-Leste tuir dokumentu ka lisensa peska ne’ebé FM asesu. Ne’e buat ne’ebé estrañu tebes no interasante tebes atu buka hatene prosesu sira hodi hetan lisensa peska nian, enkuantu hatudu iha públiku katak ne’e empreza estranjeiru nian maibé dokumentu relata oin seluk katak na’in ba empreza refere ema sidadaun nasional ka Timor-Leste. Prosesu hasoru peska Tubaraun seidauk ramata no interesante tebes ba autoridade sira seguransa no justisa loke investigasaun foun kona-bá lisensa peska ba Hong Long Fisheries, Lda. FM la iha ona dúvida kona-bá konflitu de interese ba lisensa peska nian no maneira seluk hodi hetan lisensa maka fa’an lisensa peska ba parte terseiru (Hong Long Fisheries, Lda) hodi hetan benefisiu ekonómiku ruma. Prátika sira nune’e proibidu tebes tuir Dekretu Lei Governu No. 6/2004, 21 Abril 2004, Baze Jeral Rejime Juridiku ba Jestaun ho Ordenamentu Peska ho Akikultura, artigu 30 katak lisensa peska komersial labele alienadu ka sai objetu atu aluga, ka hamonu obrigasaun ruma ka hamosu direitu seluk ne’ebé fó benefisiu ba ema seluk (third parties). Nune’e iha regra aplikável sira hodi regula no bele haree fila fali empreza nia lisensa ka ho lian seluk suspende lisensa ba  Hong Long Fisheries, Lda.

Relatóriu FM nian mos deskobre katak Hong Long Fisheries, Lda nia ligasaun besik ho empreza Pingtan Marine Enterprise Ltd. Dokumenta mos katak ró peska 15 Hong Long Fisheries, Lda nian hanesan propriedade empreza Pingtan Marine Enterprise Ltd  nian no ida ne’e la’os dokumentu segredu ida no públika momos iha sítiu empreza refere nian. Faktu sira nune’e, fo klaru liu tan Hong Long Fisheries, Lda nia na’in lólos maka empreza Xineza nian no la’os buat falsu ida hakerek iha lisensa peska ne’ebé deklara nu’udar na’in ba Hong Long Fisheries, Lda. Signifika katak Hong Long Fisheries, Lda hetan lisensa peska liu husi dalan fraude ka bosok.

Faktu importante seluk ne’ebé FM hetan katak Pingtan Marine Enterprise Ltd involve iha peska ilegal no krime transnasional sira iha mundu hanesan trafiku umanu, servisu forsadu no fraude de investidor sira. Faktu ne’ebé besik liu, viziñu Indonézia bandu ona Pingtan Marine Enterprise Ltd ho nia afiliasaun negosiu ne’ebé utiliza husi Pingtan Marine Enterprise Ltd labele halo atividae peska iha sira nia tasi. Komete mos fraude de investidores ne’ebé akuza ona husi Tribunal Federal Estadu Unidus Amerika nian iha loron 24 Novembru 2014. Nune’e mos involve iha kazu omesidu ida iha tasi Fiji nian iha tinan 2015. Inklui ró Hong Long Fisheries no Pingtan Marine Enterprise prende tamba deskonfia halo peska ilegal ba ikan Tubaraun iha Galapagos Marine Reserve iha loron 13 Agustu 2017.

Buat sira nune’e, lólos Ministériu Agrikultura no Peska tenke buka hatene antes hasai lisensa peska ba Hong Long Fisheries, Lda no empreza refere mos subar ninia erru sira ne’ebé komete iha rai seluk. Maibé informasaun sira nune’e la’os buat segredu ruma no notisia públiku. Dalaruma Ministériu Agrikultura no Peska lakohi buka hatene no dalaruma hatene mos maibé desvia husi ida ne’e. Ida ne’e hatudu momos ona iha lisensa peska ba Hong Long Fisheries, Lda katak na’in ba empreza refere ema sidadaun nasional ka Timor-Leste maske públiku hatene katak empreza refere estranjeiru nian. Faktu ne’e hatudu kona-bá fraude ka bosok hodi hetan lisensa peska nian.

Iha sorin seluk empreza Pingtan Marine Enterprise Ltd utiliza Hong Long Fisheries, Lda hodi hetan lisensa peska foun iha Timor-Leste. Tamba empreza Pingtan Marine Enterprise Ltd nia istoria nakonu ho atividade kriminal iha nasaun sira ne’ebé empreza ne’e hala’o nia atividade peska ba. Nune’e dalan ida atu tama iha Timor-Leste liu husi fraude ka bosok no utiliza parte seluk hodi hetan lisensa peska nian.

Tamba ne’e Timor-Leste presiza mellora nia kapasidade hodi halo jestaun ba peska nian, lisensiamentu, regulamentu, kontrolu no kapabilidade seguransa marítima nian hodi asegura riku soin sira iha tasi. Ida ne’e potensia ida ba Timor-Leste tenke koloka hanesan prioriodade ba dezenvolvimentu nasional hodi hetan benefisiu ekonómiku ida sustentavel.

Rekomendasaun

1 - Lisensa peska husi Hong Long Fisheries, Lda tenke kansela permanente, tamba Hong Long Fisheries, Lda la onestu no falla hodi taka ninia relasaun besik ho “parent company”, Pingtan Marine Enterprises (no sira nia afiliasaun ba empreza sira) nomos sira nia istoria kriminal.

2 - Ró 15 husi Hong Long Fisheries, Lda ne’ebé maka kaer ikan tenke prende no hapara hodi uza iha Timor-Leste ba dezenvolvimentu peska industrial domestika.

3 - Ba daudauk ne’e, sai prioridade, setor seguransa Timor-Leste tenke kompleta ho kapasidade ró patrulla no vijilânsia ka fiskalizasaun ne’ebé adekuadu no sustentavel hodi premite protesaun soberania tasi Timor-Leste nian.

4 - Ministériu Agrikultura no Peska ne’ebé fó lisensa ba Hong Long Fisheries,á Lda tenke investiga no prosesa tuir lei ba iha kazu ne’ebé liu dadauk ne’e.

Fundasaun Mahein (FM), 23 Novembru 2017