segunda-feira, 18 de setembro de 2017

Fidelis: Governu Foka Investimentu Umanu

DILI — Vise Prezidente Partidu PLP Fidelis Magalhaes husu ba VII Governu Konstitusional, neebe xefia husi Primeiru Ministru Mari Alkatiri, atu foka liu ba investimentu umanu, laos grande projetu neebe laiha retornu.

“Parabens, ami esperansa VII Governu Konstitusional halo servisu halo didiak,   ami husu  sira atu foka liu ba investimentu umanu, laos ba grande projetu neebe laiha retornu ,” dehan Fidelis ba STL  iha PN, Dili, Sesta (15/09/2017).

Nia dehan, PLP hanesan oposizaun no konsideira knar oposizaun hanesan alserse ida ba demokrasia.Maske nunee Fidelis hateten, Bainhira VII Governu Konstitusional halo servisu diak ba povu, konserteza lao ba oin, maibe halo ladiak bele monu.

“Ami nia papel mak atu hare no fiskaliza servisu governu nian, ami labele halo kompromisiu dehan nee ami konkorda ida neeba ami lakonkorda,” dehan Fidelis.

Iha fatin hanesan Ministru Prezidensia Konsellu Ministru, Adriano do Nascimento dehan sira ofsializa ona komitmentu ho akordu koligasaun entre partidu Fretilin ho PD, kuandu partidu asina hanesan militante prontu atu servi iha kualker pozisaun.

Entretantu Primeiru Ministru Mari Alkatiri dehan VII Governu Konstitusional sei hahu ho programa importante neebe sai prioridade maka dezenvolvimentu no relasaun internasional.

“Atu halo reforma iha institusional hodi reforsa ita nia kapasidade administrasaun ho jestaun no aumenta kapasidade ba ita nia rekursu umanus,” dehan PM Mari Alkatiri. 

Carme Ximenes/ Maria Lay | Suara Timor Lorosae

Sem comentários: