PR timoroan haruka diploma tolu ba fiskalizasaun preventivu hosi konstitusionalidade

Prezidente Repúblika timoroan haruka ona ba Tribunal Rekursu, ba fiskalizasaun preventivu hosi konstitusiolidade, diploma tolu iha área ambiente no kontrolu ba veíkulu sira, preokupadu ho taxa sira no multa sira ne'ebé hatete iha dekretu sira. 

Iha komunikadu, Prezidénsia Repúblika explika katak diploma sira ne'e, haruka hosi Parlamentu Nasional no hosi Governu, maka Rejimi Jeral Ai-Laran nian, dekretu-lei ida kona-ba Protesaun no Konservasaun ba Biodiversidade no ida seluk kona-ba kontrolu hosi entrada no saída ba veíkulu sira iha Timor-Leste.

Nota refere katak pedidu fiskalizasaun ne'e haree "liuliu kona-ba taxa no multa sira (kastigu administrativu sira ne'ebé aplika bainhira iha kontraordenasaun/infrasaun administrativu) ne'ebé maka previstu iha diploma sira".

Iha konkretu, no iha kazu hosi Rejimi Jeral Ai-Laran nian, Francisco Guterres Lu-Olo "husu ona verifikasaun hosi inkonstitusionalidade tanba omisaun", liuliu atu Tribunal Rekursu "verifika karik iha inkonstitusionalidade bainhira Parlamentu la aprova Rejimi Jeral kona-ba multa sira, tanba asuntu ne'e hanesan kompeténsia hosi Parlamentu".

Iha textu kona-ba Protesaun no Konservasaun hosi Biodiversidade, xefe Estadu iha dúvida "ba norma sira relasionadu ho kriasaun multa sira" tanba "maski hanesan kompeténsia hosi Parlamentu, Governu maka aprova folin multa sira nian la presiza Rejimi Jeral ida ne'ebé estabelese multa sira ne'ebé Parlamentu aprova".

Ikusmai, iha dekretu ikus, Lu-Olo observa katak textu "kalkula matéria sira ne'ebé seidauk iha Rejimi Jeral rasik".

"Xefe Estadu defende mós katak Rejimi Jeral hosi taxa sira no multa sira tenki aprova hosi Parlamentu", refere hosi nota Prezidénsia nian.

"Husu mós fiskalizasaun privativu hosi konstitusionalidade nian hosi diploma hanesan tanba hamosu dúvida kona-ba kriasaun hosi taxa sira no multa sira. Maski aprovasaun hosi asuntu sira relasionadu ho taxa no koima sira hanesan kompeténsia hosi Parlamentu, maibé Governu maka iha responsabilidade maski laiha Rejimi Jeral ida antes ne'ebé kria hosi Parlamentu Nasional", hatete.

SAPO TL ho Lusa