PLP Hakarak Sai Opozisaun Edukadu

DILI, (TATOLI) – Prezidente Partidu Libertasaun Populár (PLP), Taur Matan Ruak hateten PLP sei la tama iha koligasaun ruma hodi forma governu maibé hakarak sai opozisaun edukadu iha Parlamentu Nasionál (PN).

“Ami hanesan partidu ki’ik, partidu ida ne’ebé vokasionadu liu ba opozisaun. Ami kompromente án katak sai opozisaun ida ne’ebé edukadu, rasionál no konstrutivu”, afirma ba jornalista iha Palásiu Prezidénsia Repúblika, Bairu Pité, kuarta ne’e hafoin sorumutu ho Prezidente Repúblika, Francisco Guterres Lú Olo hodi ko’alia kona-ba estabilidade no pás.

Nia dehan kontente ho rezultadu eleisaun tanba antes ne’e la imajina hakat liu barreira pursentu haat maibé ikus mai hetan to’o kadeira ualu. Tanba ne’e, PLP sei prepara án di’ak ba eleisaun jerál 2022.

Eis Prezidente Repúblika ne’e promete sei la ba túr hanesan deputadu. “Ha’u sei la ba Parlamentu Nasionál, maibé entrega ba foinsa’e sira. Ha’u hakarak iha liur de’it para serbisu ba partidu”, dehan tan.

Biban ne’e, Matan Ruak elojia populasaun sira ne’ebé durante ne’e partisipa iha eventu demokrasia ho pasífiku tebes no toleránsia a’as.

Jornalista: Xisto Freitas | Editora: Rita Almeida

Foto: Lider na'in rua, Taur Matan Ruak no Francisco Guterres Lú Olo hakuak malu hafoin enkontru iha Palásiu Prezidénsia Repúblika hodi deskuti kona-ba pás no estabilidade nasaun. Imajen Mídia Palásiu PR.