ONU Apresia “Maturidade Polítika” Timor-Leste

DILI, (TATOLI) - Vise-ministru Negósiu Estranjeiru, Roberto Soares informa katak Organizasaun Nasaun Unida (ONU) apresia maturidade polítika, lideransa no povu Timor-Leste tan hala’o eleisaun ho trankilidade no dame.

“Iha nasaun unida, hothotu apresia tebes, liliu maturidade polítika Timor-Leste ninian iha prosesu kampaña no depois eleisaun,” informa vise-ministru hodi relata tuir saudasaun sekretáriu Jerál ONU, António Guterres, liuhusi konferénsia imprensa, iha salaun VIP, Aeroporto Internacional Nicolau Lobato, Díli, ohin bainhira fila husi Nova Iorke.

Organizasaun internasionál ne’ebé Timor-Leste hola parte nu’udar membru ba da-191, nasaun sira ne’ebé mós envolve, sira hotu orgullu hodi haree katak Timor-Leste sai hanesan istória susesu ba nasaun unida.

Timor-Leste hatudu ba mundu katak maske foin sai husi postu konflitu maibé konsege ultrapasa “festa demokrásia” ida ne’e ho di’ak.

“Prova ba nasaun hothotu iha mundu katak maske Timor-Leste konsidera nasaun ne’ebé sei frájil, país ne’ebé mai husi post konflitu maibé Timor-Leste konsege ultrapasa, hatudu ba mundu liliu haree ba interese povu no nasaun nomós iha interese ba relasaun internasionál nian,” vise ne’e akresenta.

Vise-ministru Negósiu Estranjeiru ne’e mós haktuir katak sekretáriu Jerál ONU, António Guterres hato’o saudasaun no kumprimenta lideransa nasionál Timor-Leste, prezidente repúblika, primeiru-ministru, no lider nasional Kay Rala Xanana Gusmão, Mari Alkatiri no lideransa sira seluk.

Nune’e mós, apresia dezenvolvimentu polítika Timor-Leste, liliu nia preparasaun hodi eleisaun ne’ebé mak foin ba dahuluk iha istória Timor-Leste, la iha supervizaun, la apoiu husi ONU ka rai sira seluk.

“Sekretáriu jerál hato’o mós ninia kumprimentu, nia agradesimentu ba Timor-Leste liliu kona-ba Timor-Leste nia apoiu ba nia hodi avansa nia ajenda ba reforma nasaun unida nian,” informa vise-ministru Roberto Soares hodi relata tuir felisitasaun susesór Ban kin Moon ne’e.

Hodi informa mós katak sekretáriu jerál husi nasaun belun boot Timor-Leste, Portugal ne’e konfia Timor-Leste hodi kontinua apoiu ninia lideransa iha ONU no reitera nia apoiu totál inklui kongratula maturidade polítika Timor-Leste nian.

“Parabéns ba Timor-Leste ninia maturidade polítika liliu hala’o ninia prosesu eleisaun ne’ebé mak nakonu ho trankilidade, nakonu ho dame,” haktuir vise-ministru Roberto hodi sita apresiasaun eis-primeiru-ministru Portugal ne’e.

Hodi reforsa katak nasaun ne’ebé restaura nia indepedénsia iha maiu 2002, hafoin deside haketak aan husi Indonézia liuhusi referendum 1999 ne’e projeta ba mundu valór demokratizasaun.

“Timor-Leste tane aas tebes valór demokratizasaun no liliu lori Timor-Leste sai nasaun ida ne’ebé mak di’ak liu, nasaun ida ne’ebé mak proseperu, atu bele kontribui ba nasaun unida,” hateten tan vise-ministru hodi haktuir eis-komisáriu nível altu ba apoiu refujiadu, António Guterres.

Jornalista: Rafy Belo | Editór: Manuel Pinto