Alkatiri-Xanana-Taur Tenke Hakuak Malu

AMBENU – Akademiku Oecusse oan husu ba lider fundodor nasaun Timor Leste (TL) maka hanesan Mari Alkatiri, Kay Rala Xanana Gusmao, Taur Matan Ruak tenke hakuak malu, maske durante nee insulta malu iha kampania laran, ohin hetan asentu iha Parlamentu Nasional, husu atu hadomi malu lori nasaun nee ba oin.

Deklarasaun nee fo sai husi Direktur Dili Institute of Technology (DIT) kampus Regional Enclave Oecusse, Lamberto Salu iha nia knar fatin kampus DIT Palaban katak tempu kampania liu ona, idak-idak hare nia servisu, nudar povo espera deit ba fundador nasaun RDTL atu hakuak malu lidera rai nee ba dezenvolvimentu  future nian.

Tuir hau nia observasaun durante kampania, lider sira bele kolia liafuan kroat kontra malu, maibe agora kampania liu ona, ami husu nafatin atu tur hamutuk, liu-liu lider tolu mak hanesan Maun Taur Matan Ruak, Maun Mari Alkatiri, Maun Kay Rala Xanana Gusmao atu hakuak malu ona, kaer liman ba malu hodi kontinua forma ita nia VII guvernu nee ho diak, tanba kuando nasaun nee ba oin, tanba husi sira mak harii nasaun nee,  entaun ba oin tenke hamutuk hodi dezenvolve diak liu tan nasaun nee ba oin,” hateten Lambertu iha kampus DIT Oecusse Tersa (25/7/2017).

Nia hatutan, kestaun nee laos akademika deit maibe lideransa komuitariu sira mos husu ba lider sira tenke unidade atu oinsa hare futuru nasaun nee ba oin, nomos ba jerasaun sira atu aban bairua sira mos bele servi ba nasaun nee.

Tuir xefe do suku Lela-Ufe Jose Neno dehan persiza unidade, tanba unidade, respeitu malu mak save ida atu manan buat foun ida.

Nee duni komunidade persiza mos moris ho dame, lider sira mos persiza dame atu hare ita nia nasaun nee, kria amizade diak entre povo ho guvernu, entre lider ho povo. Hau husu deit ba lider historiku sira mak hanesan Maun Ramos Horta, Xanana, Mari, no Taur, sira nee mak aman ba nasaun TL, ami povo husu aman sira atu hakuak malu nafatin, labele husik malu, selae ami oan sira mos, atu fir ba se, ami espera sira, tanba nee husu tenke hamutuk para hare ami povo kiik iha baze, ba ami nia moris nomos bele dudu oan sira atu badinas eskola hodi jerasaun nee ba oin nafatin,” Katak Neno.

Sentimentu nee hanesan mos hatoo husi foin sae Agustinho Elu husi Bairo Cruz dehan lider historiku sira bainhira insulta malu iha kampania nia laran agora liu ona, nee laos buat odio malu.

“Hau senti ita nia komunidade sira labele halo ba lia, selae too ikus komunidade mak sai vitima, iha media social ita hare balu tolok malu, trata malu hatudu imajen la diak ba ita nia lider sira, nee labele, ita tenke hatudu maturidade diak ba lider sira, respeitu sira tanba sira mak ita hamutuk ida deit,”dehan nia. Abilio Elu Nini

Suara Timor Lorosae