sábado, 17 de junho de 2017

Oekusi Nia Susesu Sai Ezemplu Ba Munisípiu Sira

OEKUSI (TATOLI) - Prezidente Rejiaun Administrativa Espesiál Oekusi-Ambeno, Marí Alkatiri hatete, munísipiu 12 hein hela saida mak akontese iha Oekusi atubele akontese iha munisípiu sira seluk tanba Oekusi sei sai hanesan ezemplu.

Prezidente ne’e fiar katak Estadu tomak lakleur tan sei asume ida ne’e, nesesidade atu kaer ba esperiénsia tempu badak Oekusi nian atu habelar hanesan polítika no programa mas buat hotu labele kópia tuir de’it no laiha kopia tanba kada munisípiu iha nia espesialidade.

“Mas hanesan programa, hanesan polítika sim! Ita bele habelar no ekonomia, sosiál no merkadu futuru bá Timor-Leste nian. Ne’e ha’u laiha dúvida”, katak.

Nune’e, Estadu fó fiar ba nia hodi lidera RAEAO, agora tempu ona fó fiar bá timoroan sira seluk atu habelar esperiénsia ne’e ba fatin hotu.


Sekretáriu Rejionál Agrikultura no Dezenvolvimentu Rurál, Remígio Salo hatete  importante tebes iha polítika Estadu Timor-Leste ne’ebé haruka no fó fiar ba Dr. Marí Alkatiri no povu Oekusi servisu hamutuk hodi satan mota Tono atubele fó matak malirin no moris ba povu hotu.

“Ita hotu hamutuk ho eselénsia Dr. Marí Alkatiri nia lideransa tomak iha primeira istória Oekusi kona-ba istória ne’ebé Ita bele kaer duni oinsá mak Ita bele hamutuk ho Estadu no fiar ida Ita bele halo dezenvolvimentu Oekusi nakfilak dezafiu sira ne’ebé lasusesu, agora Ita bele hakat bá oin”.

Gaspar Bolquifaí, reprezentante Sub-Rejiaun Pante Makasar​ lori suku haat, Cunha, Lalisuk, Kosta no Lifau hato’o obrigadu barak ba Governu Timor-Leste liuhusi Prezidente RAEAO tanba hetan benefísiu husi Irrigasaun ne’e.

Jornalista: Maria Auxiliadora | Editór: Manuel Pinto

Foto: Serimónia inaugurasaun Rede Irrigasaun Tono. Foto: Maria Auxiliadora

Sem comentários: