Estadio municipal Manatuto sei hanaran estadio Kayrala Xanana Gusmão

MANATUTO - Estadio Munisipal Manatuto ninia konstrusaun iha ona 90%. Estadio ne’e autoridade lokal no populasaun sei hanaran Estadio KAYRALA XANANA GUSMÃO. Presidente Autoridade Munisipiu Manatuto, Fernando Sousa hatete, tuir sira nia observasaun katak estadiu nia progresu lao diak, ne’e dunik nia fiar katak iha tempu badak bele remata ona.

Nia parte konsulta ona ho povu Manatuto tomak katak sira sei tau naran ba eroi boot no lider karismatiku, Jose Alexandre Gusmão nia naran revolusionariu no koinesidu iha mundu tomak mak Kayrala Xanana Gusmão. “Razaun ami tau naran ne’e tanba nia ema Manatuto oan, no nia mos uluk hanesan futebolista (eis jogador).

Tanba ne’e mak ami desidi tau maun Xanana nia naran, hodi nune’e bele motiva diak liu tan joven Manatuto sira iha area desportu modalidade futebal,” dehan Fernando ba Jornalista BT iha k’nar fatin Manatuto, semana liu ba. Iha fatin hanesan Direktur Kompañia Obrai Unipessoal.Lda, Luis Oliveira realsa katak, hanesan kompañia, nia prontu atu intrega projetu ne’e iha fulan rua ou tolu nia laran. Maibe problema ida agora ba nia mak pagamentu, tanba governu sei prosesu tuir sistema sira nian.

“Ne’e dunik, se iha fim de fulan Junhu mak governu halo ona pagamentu ba ami, hau pormete katak iha fim de fulan Agostu ami prontu intrega ona, tanba mos hakarak intrega lalais. Maibe se to fali fulan Julhu ka Agostu mak governu foin selu ida ne’e problema bo’ot ituan, tanba ami la bele intrega tuir tarjetu ami nian,”imforma Luis.

Maibe parte kompañia esforsu no tenta hela para oinsa governu bele halo lalais pagamentu, hodi nune’e sira bele aselera projetu ne’e para hotu lalais iha tempu badak, tanba nia rasik ema Manatuto oan. Ne’e dunik nia mos hakarak oferese buat ne’ebè mak diak dunik ba nia rai ho kualidade. Entertantu tuir observasaun Jornalista BT iha tereinu katak, progresu husi Estadio Munisipal Manatuto oras ne’e lao namanas hela ne’ebè atinji ona 90%, tanba servisu todan remata ona, falta deit servisu kikuan hanesan, monta keramik, plafon no servisu kikuna sira seluk. (BT)

Business Timor