domingo, 28 de maio de 2017

Resensiamentu Obrigatoriu, Vota La Obriga

DILI, (TATOLI) - Ministru Negósiu Estranjeiru no Kooperasaun (MNEK), Hernani Coelho fó hanoin katak, Nasaun Timor-Leste opta Resensiamentu Eleitoral obrigatoriu, maibé atu vota estadu no nasaun la obriga nia sidadaun.

“Resensiamentu iha estranjeiru ajusta mós iha rai laran, resensiamentu obrigatótiu, maibé ema ba vota la’ós obrigatóriu. Hanesan iha eleisaun prezidensial ema rejista barak mas vota ituan tamba sistema mak hanesan ne’e,” Hernani Coelho esplika ba jornalista sira iha salaun VIP MNEK, Sesta (26/5).

Ministru ne’e kompara uluk ita halo iha Austália ho Portugal de’it, agradese ba Austrália tamba fó apóiu tomak ba ekipa téknika ne’ebé halo servisu iha Austrália, maibé agora Loke tan, tuir planu sei halo mós eleisaun iha Korea no Inglatera.

Tanba ne’e, ekipa tékniku sira halo hela viajen ba estrajeiru atu hare kondisaun, bainhira iha relatóriu tama, Konselhu Ministru sei deside, inklui fó sai kona-ba númeru resensiamentu iha estranjeiru.

Rajaun Governu halo esforsu tomak atu mobiliza ema timoroan iha estranjeiru, tamba nu’udar sidadaun sira iha direitu atu vota atu kontribui ba dezenvolvimentu nasionál liuhosi hili partidu polítika sira ne’ebé sei ukun rai ne’e.

Aleinde ida ne’e minimiza taxa partisipasaun minimu iha elisaun hanesan iha elisaun prezidensial. governu halo ona avaliasaun iha eleisaun prezidensial konklusaun iha fator balun mak kauza partisipasaun ne’ebé minimu hanesan loron eleisaun ne’ebé iha loron servisu, distansia entre sentru votasaun ho ema nia hela fatin ne’ebé dok, no informasaun ladun to’o ba komunidade.

Tamba ne’e nia faze agora governu interven iha fatin tolu ne’e, buka atu eleisaun halo iha loron ne’ebé la’ós loron servisu no agora dadauk deside sei halo iha fin de semana, sentru votasaun sei hari bazeia proposta atu monta iha ne’ebé, no sei halo kampaña informasaun, governu sei dezenvolve mekanismu komunikasaun ba komunidade sira atu sira hetan informasaun diak.

Jornalista: Julia Chatarina | Editór: Manuel Pinto

Foto: Ministru Negósiu Estranjeiru no Kooperasaun (MNEK), Hernani Coelho

Sem comentários: