MEDIA SOSIAL TENKI RESPEITA VONTADE POPULAR

Reprezentante povu iha uma fukun Parlamentu Nasional, husi bankada CNRT, Pedro da Costa Martires, husu ba Timor oan sira ne’ebé  mak uza  media sosial tenki respeita vontade popular ne’ebé desidi Francisco Guterres ‘Lu-Olo’ ba Prezidenti Repúblika, periodu 2017-2022.

Tuir deputadu Pedro  da Costa, fenomena  ne’ebé mak fo sai iha media sosial  liu-liu Facebook haree katak,  iha ema balun la simu rezultadu eleisaun Prezidensial hodi hasai liafuan ladiak hasoru Prezidenti Repúblika eleitu Francisco Guterres ‘Lu-Olo’.

Nia dehan, eleisaun Prezidensial ne’e hanesan eleisaun sekretu ho partisispasaun povu nian, mesmu la máximu. Maibe povu aprezenta ona ninia vontade ba vota.

“Ami hanesan reprezentante povu mos lakonkorda vizaun ho opiniaun ida media sosial balu ne’ebé ho deklarasaun hanesan ne’e, tanba eleisaun ida foin dadauk ne’e hanesan eleisaun ida ne’ebé trasparante espresa vontade popular mesmu la maximu tanba kestoens tekniku balun partisipante sira barak mak la vota maibe ne’e vontade popular ida ne’ebé hatudu era demokrasia ne’ebé ita moris ba, tanba ne’e se-se deit mak iha Timor Leste tenki respeita vontade popular ida ne’e,”informa Deputado Pedro da Costa ba JN-Diário iha PN Sesta (24/3/17).

Nia afirma, hatutan media sosial lolos fo kobertura atu haklaken informasaun ba povu labele mai kritika no labele mai minimiza fali vontade popular nian.

“Media sosial lolos fo kobertura deit  esklarese buat ne’ebé akontese  media  social labele mai kritika no labele mai minimiza fali vontade popular nian ida ne’e ladun diak,”dehan nia.

Iha parte seluk Deputadu Manuel Castro husi bankada FRETILIN  husu ba sidadaun hotu lalika kestiona kapasidade nasionalismu patriotismo ba  heroi sira.

“Imi lalika kestiona kapasidade nasionalidade patriotismo  ba ita  nia heroi sira hanesan Xanana, Lere, Taur, Falur, Lu-Olo. Ha’u hanoin ba ita jerasaun agora ne’ebé ita goza indepedensia ita kuandu kestiona sira nia kapasidade kestiona sira nia nasionalismu ita la’os Timor oan. Se ita Timor oan tenki hatene sira mai husi ne’ebé,  ohin ita goza la’os tanba sira. Tanba ne’e ha’u hatete matenek nain sira ne’ebé mak hakerek iha facebook halo komentariu barak imi nia nasionalismu patriotismo laliu Lu-Olu,”nia esplika.car

Jornal Nacional Diário