LEI PARLAMENTAR SEIDAUK PROMULGA, CNE SEI HALO KONTESTASAUN FORMAL BA PR

Prezidente Comissão Nacional de Eleições (CNE), Alcino de Araújo Barris, hatete, sira sei halo kontestasaun formal ba Prezidente Repúblika (PR), Taur Matan Ruak, tanba alterasaun lei parlamentar balun impede kompetensia CNE nian.

Eleisaun Parlamentar sei hala’o iha fulan Julho, tinan ne’e. Tanba ne’e, Prezidente CNE sei hato’o preokupasaun ne’e ba PR Taur atu toma konsiderasaun.

 “Oras ne’e lei eleisaun parlamentar nian aprova ona, Prezidente  Repúblika (PR) seidauk promulga, ha’u hanoin CNE sei halo kontestasaun formal ba PR, atu husu fali ba Tribunal Rekursu (TR) atu halo fiskalizasaun preventiva kona ba alterasaun, tanba buat balun ne’ebé atribui ami nia kompetensia lei,”Prezidente CNE, Alcino de Araújo Barris, hatete  ba jornalista sira iha nia servisu fatin CNE, Colmera, Dili, Kinta (23/3/2017), relasiona ho komunidade balun la konsege ezerse nia direitu iha eleisaun prezidensial periodu 2017-2022 iha dia 20 Marsu tinan 2017 ne’ebé dekreto do Governu nian haruka sidadaun idak-idak ezerse nia direitu iha fatin ne’ebé nia resensia ba.

Prezidente CNE ne’e haktuir, CNE sei halo kontestasaun ba PR, tanba iha alterasaun lei eleiesaun parlamentar balun ne’ebé atribui ba CNE nia kompetensia, TR altera sein justifikasaun ne’ebé durante ne’e fo implikasaun ba kompetensia CNE nian.

“Tanba buat balun ne’ebé atribui ami nian kompetensia lei, derepenti altera, altera laiha justifikasaun. Tuir ami laiha justifikasaun  maske parlamentu dehan katak halo harmonia, maibe ba ami laiha prioridades ona ne’ebé  tuir ami implika ami, karik sira halo buat ne’e antes ne’e tenki halo levantamentu ida ne’ebé profundu no estudu ida ne’ebé mak diak maibe  halo alterasaun,”Alcino Barris lamenta.

Tuir nia, eleisaun parlamentar sei partisipa  husi partidu  lobuk ida, tanba ne’e CNE ho STAE tenki iha kbiit oinsa sira bele hala’o sira-nia servsiu ho diak, tanba husi ne’e mak entidades hotu bele hatene katak parte rua CNE nomos STAE bele halo servisu ho diak ka lae.

“Hakarak ka lakohi tenki garante ho baze legal ruma, nune’e bele halo mobilizasaun ho diak em termo  intervensaun nomos  manobra. Labele haluha katak eleisaun Parlamentar sei iha mobilizasaun barak ne’ebé parte rua CNE nomos STAE tenki iha kbiit, tanba husi ne’e mak ita boot sira bele haree katak parte rua ne’e halo duni esforsu ka lae? Nune’e tenki garante ho baze legal para bele halo  mobilizasaun ne’e ho diak, intervensaun no halo manobra ne’e forsa tenki iha tanba lei la fo kbiit, decreto do governo limita tan, no ema sei husu taxa partisipasaun ne’e menus ne’e los hela 28% la tuir eleisaun tanba sa? Iha mos kauza tanba regras sira ne’e halo formas ami laiha forsa, CNE husu STAE labele book-an, tanba muda fali ba decreto do governo,”Prezidente CNE ne’e lamenta.

Nia dehan, tanba lei la fo dalan no decretu do governo mos limita sira oinsa sira bele halo intervensaun nomos monobra nune’e eleisaun prezidensial periodu 2017-2022, taxa partisipasaun tun kuaje 28% votante lakon votus.

“Ami laiha forsa CNE husu STAE labele book an, tanba  muda fali ba decreto do Governo 2012 STAE, CNE halo regulamentu atribuisaun iha tiha lei ona, altera fali ba decreto do Governo liu rizidu labele manobra, entaun labele halo buat ida, nune’e ema balun labele ezerse sira nian direitu ne’e, tanba lei  la fo dalan, decreto do Governo la fo dalan,”Eis Ministru Interior iha Primeiru Governu konstitusional ne’e afirma.

Nia dehan, ema barak labele ezerse nia direitu tanba lei decreto do governo la fo dalan, maske lei refere la’os ladiak. Maibe limitasaun  de termo mak la dun iha flexibilidade.

“Ida ne’e mak ladun flexibilidade depois ita ladun informa kona ba direitu de partisipasaun  eleitores kona ba direitu sira nian ne’ebé ema balun lahatene  kona ba tres (3) oras sira taka ona, ne’e tenki iha regras. Regra ne’e CNE no mos STAE mak hatene mos liu kona ba ida ne’e, ne’ebé presija iha edukasaun ba votantes,”Prezidente CNE ne’e hatete.Ola

Jornal Nacional Diário