Governu Presiza Toma Konsideirasaun Ba Projetu Sentral Eletrika

DILI – Reprezentante povu iha uma fukun Parlamentu Nasional (PN), husu ba governu atu toma atensaun ba kompania neebe kaer projetu sentral eletrika, iha Betano no Hera nee atu labele hamate ahi iha tempu eleisaun Parlamentar neebe sei mai iha tempu badak.

Hau hanoin governu tenke halo desizaun ho kuidadau atu nunee prosesu elisaun ou prosesu kampania nee ahi labele mate atu nunee fo pasu ba ema seluk atu uza fali ajudika seluk iha tempu kampania, tan nee husu ba governu atu estuda didiak konsekuensia bain hira atu gasta osan ba kompania internasional neebe kaer hela projetu sentral eletrika iha Betanu no Hera,” informa Deputadu Osorio Florindu liu husi sesaun plenaria Segunda (27/03/2017) iha PN.

Nia mos informa liu tan katak, governu tenke tetu didiak bain hira fo fiar ba kompania internasional sira kaer projetu nee, no kompania neebe governu fo fiar hodi kaer projetu nee tenke servisu ho professional, ahi labele mate no folin labele karun liu fali kompania ida neebe maka kaer uluk nee karik kompania la konkorda maka, governu tenke buka meus ida liu loke fali tender atu nunee Timor oan sira mos bele kompete hotu iha laran.

Iha fatin hanesan Vice Prezidente Komisaun neebe trata asuntu infraestrutura Manuel de Castro mos hatutan, bainhira atu halo negosiasaun ho kompania internasional sira hodi halo mantensaun ba projetu sentral eletrika iha Betanu ho Hera nee, tenke hare didiak atu nunee labele monu ba lasu ema nian.

Nunee mos Prezidente Parlamentu Nasional Aderito Hugo, lamenta ho kontratu no mantensaun neebe governu halo kompania nee durante tinan lima nia laran, no agora atu detemina ona maibe governu seidauk halo preparasaun antisipada ba futuru. Madalena Horta

Suara Timor Lorosae