quinta-feira, 30 de março de 2017

Donald Tusk: Lalika finji katak ohin hanesan loron ksolok ida, maibé UE ho 27 sai unidu liu

Prezidente Konsellu Europeu, simu ona karta notifikasaun hosi ‘Brexit’, afirma ona katak "lalika finji katak ohin hanesan loron ksolok ida", maibé nia observa katak UE ho 27 sai hanesan "unidu liu" ohin loron.

"Lalika finji katak ohin hanesan loron ksolok ida, la'e mós iha Bruxelas, no la'e mós iha Londres. Afinal, maioria hosi ema europeu sira, inklui kuaze metade hosi eleitor britániku sira, hakarak atu ita kontinua hamutuk no atu ita la haketak malu. Tuir ha'u, ha'u sei la finji katak ohin ha'u senti haksolok. Maibé, ho dalan paradoksu, iha mós buat pozitivu iha 'Brexit': 'Brexit' halo ita, komunidade hosi nasaun 27, sai determinadu liu no unidu liu duké antes", Donald Tusk deklara iha Bruxelas.

Reinu Unidu, iha loron-kuarta ne'e, notifika liuhosi dalan formal ativasaun ba artigu 50 hosi Tratadu Lisboa ne'ebé determina prosesu saída hosi Uniaun Europeia.

Líder europeu sira hasoru malu iha simeira loron 29 Abril hodi defini pozisaun sira hosi Uniaun Europeia ho nasaun 27 iha negosiasaun sira kona-ba saída Reinu Unidu nian hosi bloku europeu.

'Brexit' mosu hosi rezultadu referendu loron 23 Juñu 2016, bainhira 52% hosi eleitor sira vota ona ba saída nasaun nian hosi UE, hodi halakon 48% ne'ebé hakarak permanénsia.

Dispozitivu previstu iha tratadu europeu determina katak parte rua iha tinan rua hodi hetan akordu ida kona-ba termu sira separasaun nian, ne'ebé bele iha implikasaun polítika sira, jurídiku sira, ekonómiku sira no finanseiru nian.

SAPO TL ho Lusa - Foto@ Yves Herman /EPA

Sem comentários: