Ahi ne’ebé mate estraga tiha ekipamentu importante hothotu - Timor Telecom

Timor Telecom ohin hateten katak ahi elétrika ne’ebé mate horikalan iha fatin hotu, estraga ona “ekipamentu importante”, tanba ne’e maka mosu “fallansu ba serbisu komunikasaun” hosi operadór bot Timor-Leste nian, durante oras barak. 

Iha komunikadu ne’ebé haruka ba Lusa diresaun TT “husu deskulpa ba problema ne’ebé mosu”, hodi esplika katak zona Caicoli hanesan mos “sede sentrál hosi empreza nian” mos, horikalan ahi elétrika mate, tanba ne’e afeta sira-ninia serbisu.

"Maski TT iha alternativa hodi hamoris elétrika, liu hosi bateria no jeradór, maibé ekipamentu barak maka hetan estragu, tanba ne’e durnte oras barak serbisu komunikasaun lakonsege la’o”, tuir komunikadu fó sai.

Empreza ne’e esplika katak “sira uza ona rekursu hothotu ho imediatu, hodi troka no konfigura hikas ekipamentu hirak ne’ebé envolve”, ho nune’e maka konsege hala’o hikas serbisu internet, voz ho 3G durante ohin dader madrugada.

Rezolve ona problema kona-ba SMS ne’ebé lakonsege haruka sai, maibé presija tempu naruk atu serbisu empreza nian bele la’o normál, “tanba mensajen barak maka iha hela lista hein nian”.

Kliente barak maka hato’o keixa liu hosi iha rede sosiál katak desde mosu interupsaun sira-ninia saldo “zero”, maibé Manuel Cárceres da Costa, diretór jurídiku no relasoens institusionais, haktuir ba Lusa katak empreza ladauk simu reklamasaun kona-ba ne’e.

"Ami sei rezolve ona problema hirak ne’ebé mosu", nia esplika.

Serbisu prinsipál TT nian, lakonsege la’o durante oras barak, hahú hosi horikalan tuku 20:00, to’o ohin dader madrugada.

SAPO TL ho Lusa