RESEITAS FUNDU PETROLÍFERU US$ 844 MILLOENS

Vise Ministru Finansas, Helder Lopes, informa, reseitas  fundu petrolíferu ne’ebé mak Governu rekoella iha fulan Setembru 2016, hamutuk US$ 844 milloens.

Helder Lopes esplika, reseitas ba petrolíferu iha rua, hanesan liu husi fa’an mina no ida seluk mak reseitas  ne’ebé Governu investe fila fali ninia osan ba  iha merkadu finanseiru internasional.

“Ami seidauk iha dadus ikus to’o iha Dezembru 2016, dadus  to’o iha trimester terseiru 2016 ninian US$ 188 milloens ne’e reseitas  ne’ebé mak mai husi fa’an mina. Agora reseitas ka retornu  ne’ebé mak hetan husi investimentu fundu petroíferu to’o iha terseiru trimester ka la sala to’o Setembru 2016,  ne’e hamutuk por volta de US$ 844 milloens ,”esplika Helder Lopes foin lalais  ne’e iha edifisiu Ministériu Finansas.  Nune’e iha parte reseitas domestika  ne’ebé mak Governu rekolla, iha tinan 2016 ninian  ne’e US$ 184 milloens.

“Husi reseitas domestika ba tinan 2016, tuir  ita-nia target  ne’e ita atu kolekta reseitas hamutuk US$ 171 milloens to’o ita kolekta ona 110% ka hamutuk US$ 184 milloens. Ne’ebé  em termos de kolekta  husi reseitas domestika ita kolekta liu ona alvu  ne’ebé mak ita trasa ba tinan fiskal  ida ne’e,”hatete Helder Lopes.

Nia subliña, kobransa reseitas  ne’e por fontes ne’ebé mak kobre ida  ne’e mós bele fo indikasaun katak, reseitas  ne’e husi impostu ka reseitas domestika  ne’e aumenta tanba aumentu iha aktividade ekonomiku.

“Ezemplu impostu konsumu soletivu, impostu  ne’ebé mak kolekta iha Fronteira, iha Portu, Aeroportu ka Fronteiras Terrestre, ida ne’e ninia aumentu por volta 126%, entaun  hatudu  katak, aktividade ekonomiku maka’as tanba  ne’e mak koleksaun ne’e aumenta,”dehan nia.avi

Jornal Nacional