Primeira-ministra
britániku, Theresa May, konfirma ona, iha loron-tersa, katak "Brexit"
sei implika atu Reinu Unidu husik merkadu úniku europeu, tanba Londres hakarak
hamenus entrada hosi imigrante sira ne'ebé mai hosi Uniaun Europeia (UE).
"Proposta
ne'ebé ha'u hato'o implika atu labele pertense ba merkadu úniku", May
hatete no hatutan katak sei impede governu britániku halo negosiasaun ba akordu
komersial bilateral sira.
Primeira-ministra
afirma katak sei tenta halo negosiasaun ba akordu komersial ida ho UE ho
posibilidade ba alargamentu.
Iha
diskursu ida ne'ebé dedika ba "Brexit" ne'ebé halo iha Londres, May
afirma ona katak hakarak hakotu akordu ida hodi sai hosi UE iha prazu tinan
rua, maibé nia aplikasaun sei halo "tuir faze".
Hein
kleur ona diskursu hosi Theresa May tanba kalkula ona katak sei hatete loloos
kona-ba liña negosiasaun balun Londres nian iha prosesu saída hosi UE.
Iha
Outubru, primeira-ministra hatudu ona determinasaun hodi hahú kontrolu polítika
imigrasaun nian, inklui hosi sidadaun europeiu sira, no hakotu ho soberania hosi
Tribunal Europeu ba Justisa.
Maibé,
nia hatudu mós interese hodi mantén, bainhira bele, asesu ba sasán no serbisu
britániku sira nian ba merkadu úniku, husik indefinisaun balun kona-ba interese
ne'ebé maka sei predomina.
SAPO
TL ho Lusa - Foto@ Facundo Arrizabalaga/EPA
Sem comentários:
Enviar um comentário