MOPTK “Foti Ibun” Polémika Air Timor

DILI (ANTIL) – Razaun Air Timor ne’ebe hapara nia operasaun ho rute Dili-Denpasar tamba impaktu hosi regulasaun tarifa billete aviaun ba pasanjeirus ne’ebe governu liu hosi Ministeriu Obras Públika, Telekomunikasaun no Komunikasaun (MOPTK) hasai, halo ministeriu ne’e foti ibun ba Polémika Air Timor nian.

Vice Ministru II Obras Públika, Telekomunikasaun no Komunikasaun (MOPTK), Inácio Moreira ba media sira iha konferensia imprensa esplika katak governu in prinsipiu loke odamatan ba kompana aero hot-hotu ne’ebe hakarak dezemvolve Timor-Leste iha area transporte aero nian, maibe iha parte seluk governu mos iha obrigasaun hodi regula buat balun ne’ebe tuir knar governu nian.

“Ba individu se deit mak interessadu hakarak mai ajuda Timor-Leste, impartikular halo negósiu ou investimentu, ida ne’e merkadu livre, Governu regularariza deit tuir lei sira ne’ebé iha,” Inacio Moreira esklarese iha salaun enkontru MOPTK Caicoli, Dili, Sexta (13/01/2017).

Tuir nia, Polémika Air Timor nia mosu tamba iha kondisoens finanseira ne’ebé la-fó apóia atu sira bele sustenta sira nia imprensa la’o nafatin ba oin.

“Problema Air Timor sekarik bankarota ne’e problema interna, tamba Governu labele to’o iha ne’eba, Hanesan Governu, ami iha hanoin atu regulariza deit, husu ba mídia sira lalika jeneraliza tan tamba ne’e ladiak ba ema hotu,” nia dehan.

Iha biban ne’e mós Vice Ministru, Inácio Moreira koalia kona-ba durante ne’e públiku kestiona kona ba idade aviaun nia.

“Hau atu informa deit katak, defaktu idade aviaun hanesan regulamentu tékniku ida, maibé labele ignora mós sertifikadu sira ne’ebé organizasaun internasional sira fó ba operadores sira husi operadores sira ne’ebé halo operasaun rai laran,” tenik Inácio.

Nia dehan tan, aviaun sira mai halo operasaun iha Timor-Leste , la-mai halo operasaun arbiru deit maibé sira hotu iha sertifikadu international katak aviaun hirak ne’e seguru.

“Ita labele lori lia hirak para akuza operadór sira ne’ebé iha nia nasaun nia halo hela operasaun ho diak maibé mai ita nia rai ladiak, assuntu hirak ne’e sensivel ituan, sira respeitu hotu requezitus no iha sertifidadu internasional aviasaun nian,” dehan Inácio.

Nia esklaresse tan, “agora ita hare hanusa mak ita bele hadia diak liu tan ita nia industria transporte aérius iha área aviasaun civíl nian atu nune’e bele dezenvolve ita nia nasaun bele diak tan ba oin.”

Jornalista: Julia Chatarina / Editor: Gantry Meilana

Foto: Vice Ministru II Obras Públika, Telekomunikasaun no Komunikasaun (MOPTK), Inácio Moreira halo konferensia impensa iha salaun enkontru MOPTK Kalikoli, Sesta (13/01). Foto ANTI: Julia Chatarina