sexta-feira, 20 de janeiro de 2017

Membru Governu-Deputadu Subar Iha Imunidade

DILI  – Publika kestiona makas konaba membru Governu no deputadu sira neebe maka komete iha krimi ruma, sempre subar iha imunidade nia okos, bainhira ba hatan sira nia sala iha Tribunal.

Maske durante nee Tribunal Distrital Dili haruka ona karta levantamentu imunidade hodi hasai membru Governu no deputadu sira nia imunidade, maibe Parlamentu Nasional seidauk hasai to agora.

Tuir Prezidente Partidu Parentil Flavia Pereira Lopes katak, durante nee membru Governu no deputadu sira neebe maka komete krimi ou halo sala ruma sempre subar iha imunidade nia okos, tanba tauk ba hatan iha Tribunal.

Ita hare kuandu membru Governu no deputadu sira nee halo sala ona, atu ba hatan iha Tribunal tenke hasai lai sira nia imunidade, ida nee hanesan sira tuda fatuk subar liman,” dehan Flavio ba STL, iha nia servisu fatin, Kinta (19/01/2017).

Nia dehan, Parlamentu Nasional lakoi hasai membru Governu no deputadu hirak nee nia imunidade tanba sira hakarak proteze malu deit, tan sira mesak kolega no familia.

Iha parte seluk Vise Prezidente Komisaun A (PN) deputadu CNRT Arao Noe hateten, Parlamentu Nasional  tenke tuir prosesu labele hasai nar naran, Tribunal mos haruka pedidu mai maka tempu.

Entretantu Prezidente Etika (PN) deputadu Agostinho Lay hateten, Tribunal haruka karta mai data ida halo julgamentu kolia kedan iha laran, obriga kedan data hanesan nee tenke hasai imunidade, tanba data hanesan nee atu halo julgamentu. Informasaun kompletu iha STL Jornal no STL Web, edisaun Sesta (20/1/2017). Carme Ximenes

Suara Timor Lorosae

Sem comentários: