domingo, 8 de janeiro de 2017

KONSIENSIA KOMUNIDADE IMPORTANTE BA ESTADU

Lixu sai ona problema fenomenal iha Estadu Timor Leste, tanba kuaze fatin hotu infeita ho lixu.

Kada loron lixu ne’ebé produs hamutuk 190 tonelada, ida ne’ebé konsege rekolla ne’e 40% deit, 60% ne’e komunidade ba soe iha uma sorin, valeta, mota laran no tasi ibun, tanba seidauk iha konsensia atu moris saudavel.

“Ita hela iha sidade maibe balun sei hanesan hela iha foho, lahamos uma oin, hakiak animal, balun hakiak iha luhan maibe luhan ne’e dois hodi prejudika ema seluk nia saude hodi hetan moras oi-oin,”dehan Ministru Koordenador Estado Asuntu Administrasaun no Justisa no Ministru Administrasaun Estatal, Dionisio Babo Soares iha nia kna’ar fatin, Colmera, Kuarta (04/01/2017).

Mesmu kada Sesta-feira, Governu organiza funsionariu publiku, inkluindu membru PNTL no F-FDTL tun ba iha estrada hodi hamos foer iha valeta no tasi ibun, maibe komunidade laiha nafatin konsensia atu tau foer iha nia fatin. Ironia liu ema sira ne’ebé uza kareta privadu no transporte publiku, konsume buat ruma iha kareta laran, loke vidru soe dadauk no sira ne’ebé lao ain loke rabisadu no biskuit han, nia kulit soe arbiru iha estrada.

Karik ba sira, soe arbiru hanesan ne’e hodi fo servisu ba funsionariu Servisu Agua no Saniamentu (SAS), maibe sira lakonsente katak, hahalok hirak ne’e lakontribui ba dezenvolvimentu Estadu iha area hijiene.

Ho hahalok soe foer arbiru iha foho lolon, valeta no mota maka, kuandu udan tau sempre hamosu inundasaun, tanba foer hirak ne’ebé soe bee udan lori tuir nia dalan, bainhira bee dalan mak taka metin ho foer entaun bee labele liu, nia sae fali ba estrada hodi buka nia dalan to’o estraga komunidade nia uma.

Kuandu estraga komunidade nia uma no sira lakon ona sira nia riku soin maka konsekuensia hotu Governu mak sei lori. Governu komesa prepara orsamentu no ekipamentus humanitariu hodi fo ajuda no hatun nia ekipa hodi ba hamos, kee bee dalan, hasai foer sira ne’ebé taka bee dalan, atu bee bele liu.

Iha biban ne’e, lider historiku Kay Rala Xanana Gusmão mos tun direita hodi observa, bainhira nia hare bee nalihun iha estrada nakonu, nia telefone membru Governu mai ajuda hamos no raut foer sira iha valeta, dasa tahu ne’ebé kahur ho foer iha estrada leten no orienta kompanhia sira lori ekipamentus bobot mai suru sai tahu iha valeta.

Komunidade ne’ebé asiste, balun sai mai ajuda, balun tur hare deit, sira ne’ebé uza motor hamnasa, tanba kontenti no orgulhu hare uniku lider karismatiku hanesan Xanana ho faru nakonu tahu kaer kesak ou aisar dasa no raut foer, inklui nia konversa, hamnasa, goja malu ho ninia sidadaun, balun hakilar iha mikrolete nia laran,,,,haii Xanana,,,hai avo Xanana hamos foer, nune’e halo engrafamentu iha fatin ne’ebé nia iha ba.

Sempre ida ne’e akontese, bainhira udan tau liu tiha minutu balun nia tun kedas ba fatin ne’ebé risku ba bee atu sai, iha ne’e mos komunidade mai hobor no halo servisu hamutuk ho nia.

Maibe hahalok sira ne’e lato’o ba komunidade, basa sira nafatin soe foer iha fatin fatin, mesmu iha fatin balun Governu tau tiha ona fatin lixu no Governu orienta ona administrador munisipiu Dili, administrador postu administrativu, xefi suku no xefi aldeia sira atu organiza komunidade hamos ida-idak nia bairu no soe foer iha nia fatin, maibe problema nafatin. Balun mak iha konsensia balun lae, aat liu hatene hela mais finji lahatene.

Tanba ne’e, iha tinan 2016 liu ba, Governu kria ona dekretu lei ida konaba lixu ne’ebé aprova ona iha Conselho de Ministrus no hein promulgasaun husi Prezidenti da Republika, Taur Matan Ruak.

Dekretu lei ne’e sei vigor iha tinan 2017 nia laran katak, komunidade komesa selu lixu liu husi sistema eletrisidade nian.

Sistema ne’e lao tuir nia dalan signifika, kuandu komunidade ba sosa pulsa US$1 ka US$2 hodi uza ba fulan ida, nia selu ona 0,10 sentavus ba lixu, sistema ne’e mak kua automatikamente. Se mak halo bisnis babain fulan ida nia selu 0,25 no sira ne’ebé bisnis bo’ot bele liu, ida ne’e bele ajuda reseitas Governu nian.

“Komesa tinan ida ne’e ita komesa selu ona lixu liu husi sistema ida ne’ebé ita selu liu husi eletrisidade, tanba tinan tinan selu lixu iha Dili laran ne’e $2 miloens, ne’ebé kontribuisaun sidadaun hotu tenki liu husi ida ne’e,”afirma Ministru Dionisio Babo Soares.

Nia kontinua, nasaun ona buat hotu ne’ebé uza tenki selu, laos gratis para ita hotu senti. Sidadaun hotu tenki fo ninia kontribuisaun laos husu deit.

Ho mekanismu ida ne’e, bele hanorin ona komunidade oinsa atu kontribui hanesan kantiku tetun ne’ebé artista timoroan Maria Vitoria kanta ho titulu, Aman Heroi ne’ebé iha klaran hatete, keta tane liman ba rai ne’e, maibe lolo netik liman, hodi foti ba oin.

Hein katak, Governu bele halo investimentu bo’ot iha area edukasaun hodi hasa’e kualidade humana atu sai sidadaun ne’ebé diak intermus konsensia, basa konsensia ita ema nian mak sai problema bo’ot ba Estadu.Nethy Correia

Jornal Nacional

Sem comentários: