INGLATERRA SAI HUSI UE ,TIMOROAN AMEASADU FILA

Sidadaun Timor sira ne’ebé oras ne’e dada’uk servisu iha Inglaterra ameasadu fila mai Timor Leste, tanba efeitu husi Brexit (British Exit) ka Inglaterra sai husi União Europeia (UE).

Estadu Inglatera iha tinan 2016 halo istoria bo’ot iha sira-nia nasaun hodi hala’o eleisaun jeral ida atu populasaun Inglatera deside vota ba hamutuk nafatin ho UE ka sai husi UE. Nune’e sidadaun Inglaterra sira deside sai husi UE, tanba tuir sidadaun Inglatera sira katak tama iha UE laiha benefisiu, maibé lakon mak barak.

Vise Ministru Negosius Estranjeirus no Kooperasaun (MNEK), Roberto Soares, informa, Timor oan sira ne’ebé mak servisu iha Inglaterra no Irlandia, Estadu Timor-Leste sei kontinua tau matan ba sira, maske sira lori pasaporte Portuguesa nian.

“Ita buka halo aprosimasaun ho embaixada ka Governu Portugal nian para depois oinsa sira mós bele tau matan ba sira nia sidadaun sira hotu ne’ebé mak iha Inglaterra. Konserteza Timor oan sira ne’ebé lori pasaporte Portugal, sira mós sei hetan atensaun espesial, liu husi servisu protesaun konsulares ka protesaun sidadaun Portugues nian iha rai liur,”relata Roberto Soares ba jornalista sira iha Parlamentu Nasionál (PN), Kuarta (19/01).

Nia hatutan, posivelmente Governu Portugal mós oras ne’e dada’uk prepara ona sira-nia planu kona ba oinsa mak atu antisipa, karik to’o iha tempu ida Governu Inglatera deside atu hasai hotu sidadaun estranjeiru sira ne’ebé mak servisu iha Inglaterra.

Roberto dehan, desde kedas iha loron primeiru, kuandu Inglatera prepara hela atu sai husi UE, Estadu Timor Leste fó kedas orientasaun ba Timor Leste nia embaixada iha Inglatera no iha Bruxelas hodi monitoriza no akompaña prosesu konaba ida ne’e.

“Atu nune’e ita bele hatene oinsa los mak Governu Inglaterra sei halo sira nia asaun ka medidas ruma konaba Timor oan sira ne’ebé mak servisu iha Inglatera,” relata Roberto.

Nia esplika, kuandu Timor oan sira ne’ebé servisu iha Inglatera ne’e lori pasaporte Portuguesa, signifika sira ne’e sidadania Portugues.

“Liu-liu atu proteje sira para hala’o sira-nia kna’ar ho dignu, ba sira nia interese familia no ba nasaun,” katak Roberto.cos

Jornal Nacional