POSISAUN DILEMATIKA KATUAS XANANA

Husi: Vicente Maubocy, observador politico – 0piniaun iha Jornal Nacional

Katuas Xanana hasoru situasaun ida kritika no dilematika ba eleisaun Presidencial. Hili opsaun buka nia kandidatu atu compete hasoru rival FRETILIN ka suporta kandidatu FRETILIN?

Se iha kandidatu rasik, se los maka iha perfil ida + potente + competente? Husi CNRT? Partidos seluk? Ka independente?

Bainhira Katuas Xanana suporta kandidatu FRETILIN, signifika “rendisaun” ba Mari Alkatiri. Historia hatudo eleisaun anteriores rua iha kotuk, kandidatus Xanana nian vitoriosos iha 2a.volta. Nune como idade avansada ona, talvez participasaun ultima iha “palku” politico iha nia moris, Xanana sei desafia ba ultima “aposta” ho kustos saida deit. Nune dala ida tan, Xanana sei buka figura apropriado atu manang iha eleisaun Presidencial.

Iha tempo badak, fulan Abril 2017 fulan hirak tan,  hahu ona eleisaun Presidensial, i eleisaun Legislativa hahu iha fulan Julho 2017. Dirigentes politicos husi partido bot rua, Xanana ho Mari, iha preokupasaun bot, prepara sira kandidatu atu compete iha eleisaun Presidencial.

Ba FRETILIN, kandidato  existente atu orbitra maka  Presidente Partido LuOlo. Enkunto husi CNRT sei iha situasaun ‘incognita’ hela, sei dauk hatene se los? O ke certo, figuras husi kuadros politicos CNRT, la iha personagem ida ho “ kalibre “ atu compete ho rival FRETILIN.

Historia hatudo ona, iha eleisaun 2007, Katuas Xanana out sourcing  Ramos Horta, eleisaun 2012 suporta Taur Matan Ruak, kandidatos rua ne, vitoriosos iha segunda volta. Ramos ho capital, talent iha diplomacia ba kauza Timor Leste, husi 1975-1999, mundialmente conhecido, Taur conhecido internalmente, Komandante das FALINTIL depois kapturasaun Xanana, durante era ukun aan General F-FDTL, sai hanesan asset bot, hodi derrota rival LuOlo husi FRETILIN.

Who is the next? Xanana buka hela se lós?

Iha probalidade rua ba Katuas Xanana:

1. Suporta kandidatu FRETILIN, baseia ba “lei do menor esforsu”. Mas implikasaun seria, maka FRETILIN manang eleisaun Presidencial + Legislativa, Doutor Mari Alkatiri maka “ big boss” ka Chief Commander “ i konsekuentemente, ambiente democracia lakon total, mossu governo ida totalmente “tirano” signifika ema ida deit, maka kaer no decide destino nasaun nian. Atu hadia, la os facil, talvez “fakar ran”, tanba atu destrossa ka hatun tiranos sira husi poder  tenki lori demonstrasaun massal, ka “people power”, nebe evidentemente akareta ‘vitimas’ oi-oin, hanesan historia prova tiha ona.

2. Atu prevene, cenario nebe temi iha leten, Katuas Xanana tenki buka figura ida potencial, forte liu kandidatu FRETILIN, iha arena politika domestika ka internacional. Figura ida eminente no senior conhecida, ho background FRETILIN, no iha historia liga ba Resistencia, Armada ka Diplomatika.

Kalpital atu hasoru kandidato FRETILIN, hakarak ka la-kohi, tenki uza figuras seniors uluk envolve iha fileiras FRETILIN. So nune maka bele halo balansu, no iha certeza atu manang. Nune figura nebe iha “peso makas” atu hasoru rival husi FRETILIN maka –Ramos Horta tuir hakerek nain nia peskiza. Embora iha tempo  kotuk, relasaun ladun harmoniosa ho Xanana iha assuntos balu, maibe hakarak atu manang, Xanana tenki  “sacrifica “.

Trend eleisaun Legislativa 2017

Eleisaun Legislativa 2017, nakuno ho “ incognitas + surpresas”. Partido ida atu manang maioria absoluta dificil tebe-tebes.

Frakezas CNRT, nia eleitorado vota CNRT atu ukun, iha dalan klaran “passa ka fo” fali ba FRETILIN. Komportamento politico ida ne, kauza  deskontentamento bot, ba votantes sira, hodi lakon ona konfiansa. Ukun besik tinan 10, gasta ossan besik $8 billion povo kik sira sei moris nafatin iha situasaun extrema pobreza no kondisaun ma-nutrisaun alarmante semelhante ho Etiopia no Barundi tuir relatorio husi WFP tinan 2016.

“Timor Leste is one of the poorest nations in the world” relatorio ida, publika husi peskizadores husi Centre for Development Economics and Sustainability (CDES) husi Monash University, hatudo katak, populasaun sira sofre kiak no mukit iha territorio tomak ho percentage 68% relaciona ho Multi Poverty Index. (MPI). Multi Poverty index, afecta iha areas: edukasaun, saude, no standards moris, explika Dr. Katy Cornwell, authora ba  relatorio ne.

Professor Brett Inder explika:’ there are a lot public statements around poverty in Timor-Leste but what we are found is that some of these are actually misguided “. Dehan katak iha statement  publiko barak kona ba kiak iha TL menos ona, saida maka ami hetan iha terreno, informasaun hirak ne la los”.

Iha sikun seluk, tinan-tinan aloka +$1.5 billion orsamento ba desenvolvimento. Mai be, resultados minimo liu. La hatene ossan hirak ne ba parau hotu iha nebe. Multi-million mega projectos, ba Taci Mane, no ZEEMS, sector privado TL, sai hanesan “penontong setia”.

Ossan Fundo Petroleo devia aloka 5-10%  ba linhas de credito ba sector produtivo, maibe governo la iha interesse total tó ohin loron. Governo prefere liu “gambling” iha stock market no foreign exchange currency nebe nakuno ho riskos bot, ho montante $4.5 billion. Tuir analista balu, dehan katak iha perdas + $1 billion. Autora no promotora diversifikasaun Fundo Petroleo, maka arguida Doutora Emilia Pires oras ne dadaun halai ses husi julgamento Tribunal Dili.

Centralizasaun ka koncentrazaun decisaun politica no financeira iha Dili deit, afecta ausencia desenvolvimento signifikante iha Distritos, sub-distritos no areas rurais. Maioria projectos circula iha aredores Dili, loke kuak no taka kuak.

 Iha passeios barak maka halo reparasaun dala 3 tolu ona. Factos hirak hatudo katak, governantes sira, gasta orsamento “arabiru” deit, no “fraku” iha planeamento ida inteligente atu halo poupansa ba finasansas publikas.

Klaru ke koloka ministro(a) ida inkonpetente, oin sa, bele hetan output performance ida satisfatorio?. Kostuma dehan :” shit in… shit out”.. ida ne maka realidade ita hotu assiste oras ne iha TL.

Ho “poor performance” governasaun CNRT, pior liu tan orquestra sistema “kronismo “ida nebe, favorece familiars i kronis, nune, dificil tebe-tebes atu kapta simpatia. Index “desemprego kroniku” halo milhares jovens sira moris iha situasaun ida ho deskontentamento bot.

 Sistema de pagamento atrazado, akompanha ho irregulariedades, injustisas etc… konribui fortemente atu votantes sira “ses aan” husi CNRT. Nune CNRT nia kredibilidade ba votantes tun makas.

Oin sa ho FRETILIN?

FRETILIN ohin loron, hahu 2001 -2016, FRETILIN Marista. Mari maka FRETILIN, i FRETILIN maka Mari. FRETILIN nia karacter historiko lakon totalmente desde ke Mari  Alkatiri assume kargo SG iha 1o. Congresso iha fulan Maio, tinan 2001. Facto Mari Alkatiri la husi kargo SG, embora lidera FRETILIN lakon dala 2, eleisaun presidencial no legislativa,  Mari Alkatiri la sente “moe” inisiste fanaticamente assegura SG, konsidera FRETILIN asset privadu, heransa husi nia Katuas sira lori husi South  Yemen mai TL.

Trauma crise 2006, nia memorias, sei fixa hela 150 000 refugiados sira nia fuan no neon. Governo biban neba lidera husi legendario  lider historico, Doutor Mari Alkatiri. Bens, propriedades barak lakon no destruidas. Ema inocentes barak mate. Reponsabilidade tomak rekai ba Doutor Mari Alkatiri, nune labele ‘fugir o rabo da seringa’. Atan ami fiar metin, loron ida Doutor Mari ba hatan fali iha Tribunal tanba ema lubuk ida mate, tanba ambisaun disputas poderes entre nai ulun sira.

Mari Alkatiri, “troka oposisaun ho projecto ZEEMS”, mos sei iha impacto bot ba votantes FRETILIN. Tanba votantes sira fo votos atu deputados FRETILIN, kontrola, no kritica governo atu garante boa governasaun. La os buka “unanimidade” hodi fahe projectos multi million dollar hodi taka ibun. Ho attitude ida ne, votantes FRETILIN konklui katak Doutor Mari Alkatiri uza FRETILIN hanesan “instrument” buka ossan deit. La os atu defende eleitorado sira nia interesses.

 Lia los nebe evidencias hatudo ka sekunda  impossivel atu Doutor Mari Alkatiri buka argumentos hodi defende. Frakeza bot ida flagrante foin lalais FRETILIN halo eleisaun direta ba kargos SG ho Presidente. Ema atu compete la iha. Nune Mari ho LuOlo compete hasoru kaixa “mamuk”. Modelo eleisaun ida ne, uniko iha mundo.

Presidente da Republica Taur nia discursso iha Parlamento Nacional, iha loron 25 Fev, 2016, nebe kritika kona ba “unanimidade parlamentar” ba aprovasaun orsamento, aliansa Xanana ho Alkatiri hodi favorece projectos ba familiars  no amigos, mos iha impactos bot ba votantes hodi fo sira nia votos.

Mari Alkatiri nia ambisaun fila fali kaer kargo PM, nia fundamento baseia ba “Fundo Petroleo” ho montante $16.7 billion. Orsamento ba ZEEMS nebe Xanana aloka hanesan “prenda” ba unanimidade Parlamentar aprova orsamento annual  Mari Alkatiri sente la tó. Fundo Petroleo hari iha Mari Alkatiri nia governasaun, nune nia sente iha direito exclusivo atu foti decisaun tomak. Atu iha poder controla total só okupa kargo PM no FRETILIN manang maioria absoluta.

Ho aparecimento PLP + partidos barak nebe mossu, bainhira halo blokos ka koligasaun pre-eleitoral, sei absorve votos barak. Resultados eleisaun 2012, 94,772 votos deskualifdos,husi 17 partidos nebe la hakat liu barreira 3%,  ekivale 15 kadeiras, lakon saugati deit. Ho lisaun hirak ne, hatudo necessidade partidos kik sira forma blokos atu  hakat liu barreira 3%.

Iha 2012, portadores telemoveis la dun barak, nune acesso ba informasaun limitada. Em kontraste ohin loron tinan 2016 iha fulan Novembro portadores telemoveis barak ona. Ho existencia  kompanhia 3 telekomunikasaun, portadores husi TT 670 000. Telemor 430 000 Telekomcel 235 000. Ho total numero exorbitante ida ne, circulasaun informasaun entre cidadaun ”semo” rapidoi iha minutos nia laran husi fatin ida ba fatin seluk liu husi SMS, FB, WhatsApp, Youtube etc..

Baseia ba teoria “ information is knowledge, information is power, information can build or destroy anything” nia impactos sei kontribui makas ba votantes sira nia eskolha no decisaun.

LEE MOS JORNAL NACIONAL