KE DESKUTI PROPOSTA 80 BA OJE 2017

Iha faze diskusaun proposta Orsamentu Jeral Estadu (OJE) tinan fiscal 2017, Komisaun Eventual (KE) Parlamentu Nasional (PN) halo dau-daun berifikasaun ho diskuzaun ba proposta 80.

Proposta hirak ne’e mai husi  orgaun diferensia, komesa kedas husi Prezidensia Republika to’o iha orgaun autonomu sira.

“Diskusaun diak teb-tebes, maske ho introdusaun estrutura OJE intermus lei orsamentu ninian iha mudansa ida signifikante teb-tebes, maibe a produtivu, pro ativu ho partisipasaun membru KE,” hateten Prezidenti Prezidenti PN, Aderito Hugo da Costa, hodi responde jornalista sira iha salaun Ministeriu Negosiu Estranjeirus no Kooperasaun (MNEK), Sesta (2/12/2016).

Komisaun Eventual ne’e kompostu husi membru sira Bankada Parlamentar 4, kompostu husi Bankada CNRT, FRETILIN, PD ho Frenti-Mudança.

Aderito Hugo hateten,  proposta hirak ne’e, barak mak atu ba halo adiantamentu, alterasaun ne’ebe barak liu proposta ne’e husi diskusaun ne’ebe iha entre komisaun eventual ho Governu konsege konsensus katak proposta sira ne’e bele iha, maibe labele muda tetu orsamentu, katak orsamentu ne’ebe Governu aprejenta sei la muda aumenta no nein muda menus.

Aderito hateten, komprimisiu ne’ebe mak halo desde diskusaun iha KE define ona komprimisiu sira ne’e, tanba ne’e, proposta hirak ne’ebe ho karater husu atu foti husi fundus infra-estruturas ne’e labele simu, proposta ne’ebe mai atu husu foti husi rezerva kontizensia mos la simu, tanba Governu kuandu aprejenta proposta OJE 2017 sira halo exercicio ida ho extraordinario ba redus montante ida ne’e ho  US$ 1.3 bilhoens.

“Ne’e halo tiha ona exercicio ida extraordinaria nune’e maka komisaun eventual  ho ninia karater ida konsensual hot-hotu tama iha ne’e, ne’ebe proposta ho total 80 ne’e barak liu ho konsensus retira iha deit balu, tanba razaun balu labele ignora, entaun KE ajusta,” sublinha Aderito Hugo.

Atual deputado bankada CNRT ne’e esplika katak, husi proposta 80 ne’e, ne’ebe mak substansial teb-tebes ho montante orsamentu maka iha proposta hat ne’ebe mak atu foti orsamentu, maibe orsamentu ne’e la’os foun, mais transfere husi linhas ministeriais sira seluk ninian, para depois ajusta, maibe Governu sei simu hela razaun katak bele, maibe sira sei halo exercicio internal ida hodi nune’e konfirma iha loron tuir mai.

Diskusaun ba OJE 2017 iha faze especialidade iha Komisaun Eventual, sei kontinua iha Segunda (05/12/2016),  atu ajusta ona konsensus sira ne’ebe mak akontes durante deskute iha komisaun ninian, ne’ebe iha dader Komisaun sei aprova testu subtitutivo, ne’ebe posibilidade iha parte lokraik bele kontinua especialidade iha plenaria.

Hola parte iha diskusaun ne’e, membru Governu, inklui mos Ministru Konselheiro atual Ministru Planeamentu Investimentu no Estratejiku (MPIE), Kayrala Xanana Gusmão.

Primeiru Ministru (PM) Rui Maria de Araujo, rasik la marka prezensa iha diskusaun ne’e tanba sei iha kondisaun moras nia laran. mia

Jornal Nacional