Iha Deputadu nia Matan, Misaun RTTL La Klaru

DILI: Deputadu iha Parlamentu Nasionál konsidera misaun Radio Televizaun Timor-Leste (RTTL) Empreza Públiku to’o ohin la klaru.

Deputadu sira hato’o kestaun ne’e durante diskusaun ba orsamentu ne’ebé aloka ba Sekretariu Estadu Komunikasaun Sosial (SEKomS) ho montante millaun $4.357, iha debate espesialidade Orsamentu Jeral Estadu 2017.

Deputadu husi Bankada CNRT, Cesar Piloto hato’o ninia preokupasaun ba orsamentu iha tranfarensia públika ba misaun RTTL EP nian, tanba nia konsidera RTTL EP ninia misaun la klaru.

Tuir deputadu Piloto, durante ne'e RTTL EP laiha programa edukasaun sivika ba labarik sira.

Loloos, nia hatutan, RRTL tenke halo ona programa hamutuk ho Ministériu Edukasaun atu bele apoiu labarik sira iha siensia.

“Kada tinan aprovasaun tranfarensia publikas ba RTTL boot. Maibé, realidade laiha programa edukasaun ba labarik sira,” dehan Deputadu Piloto iha ninia intervensaun, iha Parlamentu Nasionál, Tersa (06/12).

Hatan ba preokupasaun ne'e, Sekretariu Estadu Komunikasaun Sosial, Nelio Izaac Sarmento dehan, RTTL serbisu hamutu ona ho Ministériu Edukasaun hodi halo programa ba labarik sira.

Nia dehan, RTTL seidauk bele la’o mesak tanba ninia rekursu limitadu.

“Klaru programa ne'e hahú ona maibé, seidauk atinze espetativa ne’ebé ita hotu hakarak", dehan Nelio.

Maske mosu preokupasaun ba serbisu no misaun RTTL EP maibé, orsamentu ba SEKomS kontinua pasa ho rezultadu votasaun a favor 57, kontra 0 no abstensaun 0. (*)

Tomé Amado – Ola Timor - Editór: Tellukoro

Lee liu Ola Timor

Harii Edifisiu Foun, PN sei Dudu Sees Uma-kain 100

Loron Rua, Polisia Kaptura Motor 100 Resin-Karreta Estadu 17

PN sei Halo Leilaun, Kada Prado Rihun $10

Atan Ba Povu, Servi Ba Povu