CPD RDTL BELE SIMU ONA OSAN VETERANUS

Jornal Nacional, editorial

‘Sepandai – pandainya tupai melompat akhirnya jatuh juga’ lia fuan Melayu nee sai nudar lia fuan piadas  ida nebe soe hela ba organizasaun massa popular, Conselho Popular Defesa Republika Demokratika Timor Leste (CPD RDTL).

Organizasaun CPD RDTL des de inisiu independensia Timor Leste kontra governu transisaun no governu konstitusional ida nee tamba organizasaun CPD konsidera governu nebe iha Timor nee governu defakto, governu ONU nian.

CPD konsidera governu timor nee governu ONU nian, la rekonese governu nebe iha timor tan nee sira lakohi tuir sistema governasaun iha rai laran, lakohi halo kartaun eleitoral hodi tuir votasaun, lakohi trata dokumentu hodi hetan benefisia estadu ida nee.

Organizasaun nee konsidera an sira mak lejitimu liu, sira mak estadu ketak tan nee halo kartaun membru CPD rasik, halo aktividade semi militaritiku, halo aktividade koperativu no mos  metaliza membru la fiar governu konstitusional nebe forma husi eleisaun.

Los duni, konstituisaun la proibe ema forma organizasaun ka asosiasaun maibe organizasaun nee pelo kontrariu konstituisaun tamba harii fali estadu ida ha estadu ida nia laran nebe la submete governu nebe harii liu husi eleisaun demokratiku.

Durante nee membru CPD komunga doutrina CPD nian tan nee lakohi trata dokumentus nebe sai nudar rekezitu ida atu hetan benefisiu estadu tamba membru CPD nee mos barak ema veteranu maibe eleitoral laiha, lakohi rejistu tan nee lahetan osan veteranu nian.

 “Ha’u kontente los, tanba imi hotu iha ne’e iha hotu ona kartaun eleitoral, no ha’u husu nafatin ba imi atu trata imi nia dokumentus hodi simu imi nia osan veteranus, tanba imi funu nain,” Taur Matan Ruak.

Karik membru CPD iha ona kartaun eleitoral nee konkista boot estadu ida nee tamba durante governu FRETILIN no governu AMP, organizasaun CPD la submete ba politika governu nian.

Iha tinan hirak liu ba estadu taka aktividade CPD, tamba orgnaizasaun nee halo konsetrasaun iha Manufahi hodi halo kooperativa maibe membru balu ba krime no pratika semi militar tan nee governu taka fatin konsentrasaun iha Manufahi no mos taka organizasaun CPD.

Laiha duvida katak membru CPD barak veteranus maibe politika la submete ba estadu legal ida tan nee sira lakon sira dieritu pensaun veteranu nian. Ne’ebe dadaun membru CPD iha ona kartaun eleitoral, signifika rekonehese ona estadu ida nee.

Tan nee estadu ida nee tenki fo uportunidade ba membru Conselho Popular Defesa  Republika Demokratika Timor Leste sira atu trata sira nia dokumentu hodi bele hetan benefisiu osan estadu nebe aloka ba pensaun veteranu nian.*

Foto: CPD RDTL Facebook