PSHT, KORK no IKS kontinua gerilia kontra resolusaun estadu Timor-Leste

DILI - Bazeia ba peskiza ONG Belun nian hatudu katak Grupu Arte Marsiál (GAM) kontinua eziste  nafatin, maske governu deside taka kleur ona.

Diretór Belun, Luis da Costa Ximenes dehan, peskiza ne’ebé maka Belun halo liga ba arte-marsiais ne’ebé maka governu bandu sei kontinua eziste hela, tanba ne’e maka sira rekomenda ba parte kompetente atu haree ba asuntu refere.

“Papél KRAM halo ona desiminasaun informasaun ba to’o iha suku seidauk másimu, tanba ami halo peskiza hatudu katak aktividade arte-marsiais kontinua eziste hela,” dehan Luis ba jornalista sira iha JL. Vila, Tersa (18/10).

Iha fatin hanesan Komandante Jerál Polísia Nasionál Timor Leste (PNTL), Komisáriu Júlio da Costa Hornay dehan, governu liu hosi rezolusaun númeru 16/2013 hodi taka arte-marsiais tolu,Persaudaraan Setia Hati Terate(PSHT),Ikatan Kera SaktiTimor Leste (IKS-TL) ho Kmanek Oan Rai Klaran (KORK), maibé realidade sira nia atividade kontinua la’o hela.

“Maibé realidade to’o agora la’o nafatin, públiku dehan Polísia la profisionál ezekuta rezolusaun mais ha’u hanoin ita falta informasaun atu hato’o ba malu, tanba iha lei kódigu penál nia la viola buat ida, tanba nia treinu de’it ne’e la’ós krime, ami kaptura ba Tribunál liberta sira, tanba tribunál konsidera sira la komete krime,” dehan Júlio.

Nia dehan, ezemplu konkreta Polísia kaptura Timoroan barak ba sa’e sintu iha Indonézia kaptura tiha lori ba Tribunál liberta tiha ho razaun sira treinu de’it la halo krime, situasaun hanesan ne’e maka arte-marsiais sira la konsidera rezolusaun sira kontinua treiniu tanba ba tribunál sira livre.

“Ami hato’o ona informasaun sira ne’e ba governu, atu nune’e bele kria fali lei ida forte para nune’e ami kaer membru arte-marsiais sira ne’e bele hetan pena ruma,” dehan Júlio.

Entertantu, Prezidente KRAM Timor Leste, Lamberto Viana dehan, problema ne’ebé maka mosu iha TL la’ós arte-marsiais maka halo, maibé tanba kampu traballu maka laiha hodi joven sira hamosu problema.

Nia hatutan, universidade barak iha nasaun ne’e kada tinan produs sarjana barak, maibé kampu traballu laiha ne’e halo sira komete krime ne’ebé akontese iha Dili laran. (way)

Timor Post