sábado, 1 de outubro de 2016

Primeira Dama: Taur Matan Ruak La’os Fundadór PLP


Primeira Dama, Isabel da Costa Ferreira hateten Prezidente Repúblika Taur Matan Ruak la’os fundadór ba partidu foun PLP (Partidu Libertasaun Popular) maibé PLP mosu tanba espíritu hosi Prezidente Taur Matan Ruak nian.

“Prezidente la funda partidu ida. Maibé, partidu ne’e (PLP) harii ho espiritu Prezidenti nian hanesan mós Partidu Demokrátiku (PD) ne’ebé hari’i ho espiritu maun Xanana nian. 

Ne’e maka loos,” dehan Primeira Dama hodi responde ba públiku nia pensamentu ba involvementu Prezidenti Repúblika Taur Matan Ruak nian ba partidu PLP, hafoin ramata inkontru ho estudantes no Professores sira iha Eskola Sekundária Nicolau Lobato Tasi-Tolu, Dili, Kuarta (28/09/2016).

Iha biban ne’e, nia mós afirma dala ida tan katak, hanesan kaben no inan hosi oan na’in tolu (3) hosi Prezidente Repúblika nian, nia sei la apoiu Taur Matan Ruak tama partidu ka lidera partidu ida.

“Hanesan ha’u hatete ona antes katak hanesan kaben no sidadaun ho inan ba ha’u-nia oan na’in tolu (3) ha’u sei la apoiu Prezidenti Repúblika atu tama partidu ou lidera partidu ida. Ami hakarak Prezidente Repúblika sai hanesan aman, mestre, no amigu ba ami no mós ba povu Timor-Leste,” nia hatutan tan.

Isabel hatutan Timor presiza figura ida atu lidera timoroan sira no la presiza kargu Prezidente Repúblika ou tama iha partidu polítiku. ”Ohin ha’u ko’alia ho estudantes sira iha ne’e mós ha’u dehan, ita atu kontribui ba dezenvolvimentu país ida la presiza sai boot, ou muito menus tama polítika,” nia haklaken. (Jon)

Foto: Primeira Dama hasain foto hamutuk ho estudantes no profesór sira iha Eskola Sekundária Nicolau Lobato Tasi-Tolu, Dili, Kuarta (28/09/2016). Foto Matadalan/João dos Santos

Matadalan

Sem comentários: