BAUCAU: Buletin
votus ba eleisaun lideransa komunitaria halo votante barak mak konfuzaun. Tuir
komunidade balun, iha eleisaun ne'e votus barak mak sei invalidu. Entretantu,
Sekretariu Tekniku Administrasaun Eleitoral (STAE) mós la halo edukasaun votus
molok halo eleisaun.
Buletin
votus ne'ebé uza ba eleisaun iha tolu. Buletin votus ho kór mutin ba Xefe Suku,
kór kinur ba Xefe Aldeia no kór matak ba Delegadus.
Komunidade
sira, liliu ferik-katuas ne'ebé la hatene lee, hetan difikuldade tanba iha
buletin votus modelu tolu ne'e, so buletin votus ba Xefe Suku de'it mak iha
fotografia. Buletin votus rua seluk, hakerek de'it naran kandidatu sira.
"Buletin
votus ho modelu tolu halo komunidade konfuzaun, tanba maioria votante
analfabetu (la hatene lee no hakerek, Red.)," dehan Agapito Antonio
Belo, kandidatu ba Xefe Aldeia Caisido, Suku Tirilolo, Munisípiu Baucau ba
olatimornews.com, Sabadu (29/10).
Iha
fatin seluk Kandidatu Xefe Suku Tirilolo, Ricardo Ernesto Belo reforsa, maioria
komunidade konfuzaun tanba buletin votus komplikadu. Tan ne'e, iha indikasaun
sei mosu votus invalidu barak.
"Ha'u
bele dehan eleisaun suku no aldeia ne’e mosu failansu barak. Liliu kona-ba
buletin votus ne'ebé mak halo komunidade konfuzaun," nia deklara.
Molok
ne'e, tuir Ricardo, laiha sosializasaun hosi parte kompetente. Tan ne'e
komunidade barak mak kestiona kona-ba problema ida ne'e.
Alende
ne'e, problema seluk mak laiha tinta ka siñal ruma ne'ebé tau ba ema ne'ebé
vota ona. Ida ne'e hamosu posibilidade akoñtese dupla votantes.
"Ema
vota tiha bele mai vota fali. Signifika, laiha preparasaun ba eleisaun suku no
indika katak eleisaun ne'e halo ho emerjensia," nia dehan.
Iha
Suku Tirilolo, Baucau Vila, kandidatu ba xefe suku hamutuk na'in lima (5);
kandidatu mane na'in haat (4) no kandidata feto na'in ida (1). (*)
Olá
Timor – Frei Belo - Editór: Tellukoro
Foto:
Komunidade Aldeia Parlamentu, Suku Tirilolo, Baucau Vila tuir eleisaun Suku
ne'ebé realiza iha Sábdu (29/10). (Olatimornews Foto/Frei Belo)
Sem comentários:
Enviar um comentário