ALKATIRI: PONTE NOEFEFAN DIAK LIU PONTE CPLP

Prezidente Zona Espesial Ekonomia Sosial Merkadu (ZEEMS), Mari Alkatiri, garante katak kualidade ponte Noefefan-Oecusse, ne’ebe nia durasaun tempu to’o tinan 100.

“Hau hakarak hatete katak ponte ne’e sei dura to’o tinan atus ida resin, antes ne’e kalkula to’o tinan 50 deit, maibe ikus mai bele hatene lolos katak to’o tinan atus ida resin, nebe ponte ne’e laos halo ba deit nia furak maibe tenki garante mos nia kualidade nebe diak. Hau bele dehan, ponte ne’e nia kualidade liu ponte CPLP iha Comoro-Dili,”dehan Alkatiri wainhira akompaña Grupo Mulheres Parlamentar Timor-Leste (GMPTL), vizita ponte refere, Kuarta (12/10/2016).

Alkatiri dehan katak, orsamentu nebe gasta ba konstruksaun ne’e total Milhoens 17,5 USD. Maibe, tuir Mari Alkatiri katak orsamentu ne’e ki’ik kompara ho orsamentu ponte CPLP iha Dili.

Progresu konstrusaun ponte ne’e rasik atiji ona 96%, tanba ne’e, Alkatiri garante katak, iha tempu badak bele ona halo inagurasaun.

“foin primeira ves hau mai para atu hare ahi lakan diak ona ka seidauk para atu hadia, maibe hau hanoin diak ona tanba ahi lakan sufsiente i kuandu hare furak,” hateten Alkatiri.

Konstruksaun ba ponte ne’e kaer husi kompaña Adhy Karya no fiskalizasaun tekniku mai husi Portugal no Indonesia.

Iha fatin hanesan GMPTL, Florentina Smith sente kontente tebes hafoin halo visita ba ponte Noefefan nebe akompaña rasik husi Presidente ZEEMS Mari Alkatiri ho nia tekniku sira.

“Hau sente orgulho tebes ho dezemvolvimentu nebe oras ne’e lao iha Oecusse, kompara antes ne’e iha diferete teb – tebes, maibe hau espera dezemvolvimentu nebe diak labele mosu deit iha Oecusse, se bele mosu mos iha Munisipiu seluk,” dehan Florentina Smith.

Antes visita ponte Noefefan, GMPTL mos hala’o visita uluk ba iha edifisio ZEEMS no hala’o enkontru badak ho Presidente ZEEMS relasiona ho progresu dezenvolvimentu nebe oras ne’e la’o iha Oecusse. mia

Jornal Nacional