MCIA SEI HATAMA STOCK MASIMIDAR KONTAINER 20 MAI TL

Nasaun Timor-Leste (TL) durante ne’e krizi masimidar tanba stock masimidar menus, ne’eduni Ministerio Comérçio Industria e Ambiente (MCIA) liu husi koordenasaun entre kompaña STAR King sei haruka masimidar kontainer 20 mai TL.

“Ami nia parte halo ona inspesaun ba distributor sira hanesan Star King, Lisun, no Perissos identifika katak iha ne’ebá ita haree katak stock masimidar laiha duni, no liu-liu distributor Star King ninian ne’ebé kuaze masimidar toneladas 250 maka nabeen hotu, nune’e masi-midar laiha duni, nune’e atu responde ejijensia konsumidores Timor Leste ninian, ami sei hatama masimidar kontainer 20 mai, liu husi koordenasaun entre kompaña STAR King,” Vise Ministru MCIA, Filipus Nino Pereira ba jornalista sira iha konsolidasaun Partidu Demokrátiku (PD) iha aldeia 12 de Outubru Tasi Tolu-Díli, Domingu (25/09/2016).

Nia esplika katak, masimidar kontainer 20 ho saka kilograma 50 ne’ebé maka MCIA sei hatama liu husi Dubai ne’e sei to’o mai iha semana rua nia laran.

“Ami mós halo ona inspesaun ba distributor Perissos sira dehan stock masimidar laiha, no sira mós halo ona kontaktu ba iha nasaun exportador sira husi Brazil no India mós dehan katak produsaun masimidar menus, tanba impaktu husi mudansa klimatika,” dehan Nino Pereira.

Nia informa, MCIA sei buka dalan nafatin hodi haruka tan kuaje masimidar kontainer 10, por volta sakas 500 sei to’o mai TL durante semana ida.

“Ami mós sei garante katak fulan oin mai besik tama ba loron bo’ot Natal no Tinan Foun garantia stock masimidar inklui stock nesesidade baziku sira seluk hodi responde nesesidade konsumidores TL,” tenik Vise Ministru MCIA.ves

Jornal Nacional