Lei Pensaun Vitalísia, PN Haree Liu ba Pensamentu Estadu

DILI, (ANTIL) - Prezidente Parlamentu Nasionál, Adérito da Costa Hugo hateten revizaun Lei Pensaun Vitalísia (LPV) ne´e, Parlamentu Nasionál (PN) haree liu ba pensamentu Estadu maibé la haree ba ida-idak nia uniforma.

“Parlamentu haree ba Estadu ida ne’e atu trata ema sira ne’e ho saída. Ema sira ne’e Estadu maka bolu sai servidór. La importa nia mai hosi ne’ebé-ne’ebé. Tanba ida ne’e, presiza ka lae dignifika sira, iha diskusaun revizaun Lei Pensaun Vitalísia maka ita sei haree,” Hugo dehan ba jornalista sira iha Palásiu Prezidénsia Repúblika, Bairu-Pite, Dili, Kuarta (31/8), bainhira hatán ezijénsia Prezidente Repúblika, Taur Matan Ruak atu elemina totál LPV ne’e.

Nia esplika, dezisaun iha Parlamentu ne’e dezisaun koletivu. Tan ne´e, aspirasaun sira ne’e bele tama to’o iha reprezentante povu nia pensamentu ka lae.

Nia hatutan revizaun LPV tama tiha ona iha nível pareser ninian iha Komisaun Eventuál. Bainhira Komisaun Eventuál ramata tiha pareser, Hugo tenik, sei haruka mai iha Meza Parlamentu Nasionál para depois halo ajenda diskusaun.

Iha 19 Setembru, nia haklaken, Parlamentu Nasionál sei diskuti no aprovasaun revizaun Lei Pensaun Vitálisia iha jeneralidade.

“Depois maka ita hatene nia kontiudu ne’e halo nusa. En-prinsípiu, opiniaun rua maka la’o ba lei ne’ebé eziste maka elemina totál lei ne’e no ida seluk maka tenki fó rekuñesementu ba servidór estadu sira ne’e,” eis jornalista ne´e esklarese. (Jornalista: Xisto Freitas / Editor: Gantry Meilana)

Foto: Prezidente Parlamentu Nasionál, Adérito da Costa Hugo (loos) konversa ho Prezidente Repúblika, Taur Matan Ruak (klaran) no Primeiru Ministru, Rui Maria de Araújo iha Palásiu Prezidénsia Repúblika, foin lalais ne´e. Foto ANTIL/Xisto Freitas