Kazu Asidente Metiaut, Arguidu Simu Pena Suspensaun

DILI, (ANTIL) – Arguidu Patrick Simões da Costa ba kazu asidente tranzitu iha área Metiaut foin lalais ne’e, Tribunál Distritál Dili, Sesta, (23/9) hamonu pena tinan tolu ho suspensaun tinan tolu no durante fulan neen la kondus kareta nomos motor.

Leitura finál ne’ebé lé hosi juiz prosesu, José Maria Araújo kaman liu alegasaun ministériu públiku ne’ebé reprejenta prokuradór Osorio de Deus ho pena tinan tolu suspende ba tinan lima.

Desizaun ne’e, tribunál la-aplika ona indeminizasaun tanba, apoiu solidaridade hosi família arguidu ba kada vítima ho montante $10.000 hola ona parte ba multa hosi arguidu.

Ho desizaun ne’e, família vítima Emanuel Cunha, Agustinus Luan ba jornalista sira iha tribunál, Sesta, (23/9) hatete, sente triste ho desizaun ne’e.

”Agora, desizaun mak hanesan ne’e ona, ami família labele halo buat barak tanba, parte hosi ami mos simu ona apoiu solidaridade ne’e mak kastigu mos hanesan ne’e”, hatete nia akompaña hosi vítima nia inan ho oin triste.

Pena suspensaun signifika, arguidu la-tama komarka maibé, durante tinan tolu Patrick labele halo krime saida de’it.

Arguidu ne’ebé hetan asisténsia legál hosi Defensoria Públika, advogadu Câncio Xavier hetan akuzasaun hosi ministériu públiku ho artigu 140 kodigu penál ne’ebé ko’alia kona-ba omisídiu neglijente númeru 1 ho esplikasaun, ema ne’ebé, tanba neglijénsia, oho ema seluk sei hetan pena prizaun to’o tinan 4 ka pena multa.

Asidente ne’e akontese iha loron Sabadu, 17 Setembru 2016, tuku 01.00 madrugada iha área Metiaut Dili bainhira arguidu ho ninia kolega nain tolu seluk hanesan Rui Araújo Soares (oan hosi Primeiru Ministru, Rui Maria de Araújo), Jordão Sousa Maria (oan hosi Ministru Obras Públikas, Gastão Sousa) no Francisco de Assis Mariano atu asiste serimonia kasamentu iha areia Branca.(jornalista: Rita Almeida)

Foto: Prosesu no atividade povu ne'ebé buka justisa no lia-loos iha Tribunál Distritál Dili. Foto ANTIL/Antonio Goncalves