ESKOLTU SAI ‘BROKER’…?!

Jornal Nacional, editorial

Membru Parlamentu Nasional preokupa membru Polisia Nasional Timor Leste, Unidade Corpo Seguransa Pessoal (CSP) balu sai fali “broker” iha ministeriu sira hodi hetan fee ba projetu governu nian.

“Hau preokupa eskoltu sira ba iha membru Governu sira ne’e balun permanente tinan sanulu resin ona, hau husu ba boot sira tenke konfia ba instituisaun la bele konfia fali ba ema, se karik konfia fali ba ema entaun instituisaun ne’e ita deskonfia, ne’e maka uluk kedas hau dehan katak buat ida cleareng test tenki iha, tanba laiha entaun instituisaun maka tama sala fali no maun boot sira hili eskoltu tuir sira nia gostu no akhirnya jadi broker,”  Diavid Dias Ximenes ‘Mandati’.

Los duni, Corpo Seguransa Pessoal sira nee komando haruka atu asegura pessoal sira nebe responsavel ba iha orgaun soberano sira nee, Presidente Republika, Parlamentu Nasional, membru governu sira no Presidente Tribunal Rekurus, laos sai fali broker iha ministeriu sira nee.

Agora tamba sa eskoltu bele sai broker? Oinsa kontrola komando nian ba membru sira nee? oinsa regulamentu internal polisia nian hodi regula lalaos sira nee?, duvida sira nee resposta simplis, laiha politika diak husi komando jeral hodi kontrola membru sira nee.

Li-liu politika rotasaun ba membru sira nee mak ladun diak, tamba eskoltu balu fo eskoltu ministru ida too tinan lima, balu too tinan sanulu, tan nee eskoltu sira senti katak ministru sira nee laos ona konfia instituisaun polisia maibe konfiansa pessoal nebe fo seguransa ba membru governu nee.

Tamba kleur ona iha fo eskoltu ba ministru, kleur ona iha ministeriu ida nee fasil atu desenvolve konfiansa, tantu membru governu no mos empresariu sira. Eskoltu mak loron kalan fo seguransa ba Ministru no Sekretario Estadu sira? loron – loron ho ministru iha ministeriu? Tamba konfiansa iha ona, Eskoltu sai fali ponte hodi liga membru governu ho empresariu sira, nunee nia bele rekomenda kompanhia nebe nia hakarak ba membru governu nee hodi fo projetu ba.

Preokupasaun distintu deputadu sira nee los duni, kazu konkretu estrada dirasaun Bemori ba Balide, kompanhia Jonize ba ke’e atu hadia, fui alkatraun maibe informasaun ikus mai iha impendementu husi eskoltu balu.

Ne’e hatudu, eskoltu sira nee laos atu fo seguransa ba membru governu, laos atu fasilita desenvolvimentu nee lao maibe halo fali impendementu ba projetu sira nee. Ohin loron Povu Santa Cruz mak sai vitima tamba rairahun, transporte publiku laliu fatin neba no mos estraga kareta no motor nebe uza dalan nee.

Ohin loron nee bele dun eskoltu sira sai broker maibe iha tinan anterior sira nee, lahatene karik ohin loron sei akontese nafatin, lahatene los maibe publiku mos perokupa deputado balu mos partika broker, hodi rekomenda ba membru governu fo projetu ba kompanhia nebe deputadu sira rekomenda ba.

Atu evita eskoltu sira sai broker, komando jeral polisia nian mak tenki kria politika diak rotasaun nian ba ninia membru sira, bele fulan tolu, fulan nee, bele too tinan ida, labele ema ida deit too tinan lima balu fali too tinan sanulu, demais liu.

Karik membru polisia ida eskoltu ministru ida too tinan lima ka tinan sanulu, nee laos ona eskoltu maibe seguransa pessoal ona, ne’ebe asves nia mos determina desizaun nebe ministru ka sekretario estadu ida toma. Se ida nee akontese mak problema broker nee sei buras ba bebeik. *