segunda-feira, 8 de agosto de 2016

TL BELE ONA SAI MEMBRU ASEAN


Haree husi polítika no ekonomia Timor Leste (TL) bele sai ona membru ASEAN, tamba nasaun balun ne’ebé mak agora dadaun  sai ona membru ASEAN, uluk sira ninia  preparasaun la to’o 100%.

“Ha’u hanoin TL bele tama ba ASEAN, konabá ekonomia ninian nei-neik bele la’o ho diak, tanba uluk mós nasaun Myanmar, Kambodia, Vietnam no Laos sira la prepara ou la 100%, sira tama ita haree komesa haksoit ba oin, ne’e duni Timor polítikamente preparadu loos, tanba ekonomia mós lao dau-dauk mezmu laos 100%. Maibé tama iha ASEAN tinan 5 nune’e bele diak liu tan rai balun iha ASEAN,”Eis Prezidente Repúblika Timor-Leste (TL), Jose Ramos Horta, ba jornalista Sesta (05/08/2016) iha salaun desportu Sekretariu Estado Joventude e Desporto (SEJD), Lecidere-Díli.

Premiadu Novel da Paz, Jose Ramos Horta haktuir katak, agora dau-daun indikador ekonomíku sosial TL ninian balun diak liu ona nasaun Myanmar, puriemplu TL agora mediu ema moris to’o tinan 68, maibé Myanmar 64 de’it, signifika iha rai Timor indikador balun la’o diak liu ona Myanmar, Laos no Kambodia.

“Maizomenus tinan 10 tan ita bele hamutuk hanesan ona ho nasaun Malaysia ka Thailandia, portantu ha’u hanoin la’os preparadu 100%, mais lolos ita tama iha laran tiha ona maka la’o haksoit liu ba oin,”afirma Ramos Horta.

Entretantu tuir membru ASEAN People’s Forum (APF) Indonesia, Amalia Pulungan hateten, destinu Timor-Leste (TL) atu adere ba ASEAN ne’e la’os determina husi lideransa ASEAN ninian, maibé desijaun ne’e povu TL mak tenki desidi hodi adere ba ASEAN.

“Ita lalika uja kriteria adere ba ASEAN, tamba ASEAN kompostu husi nasaun Myanmar, Laos no Kambodia ne’ebé ninia kondisaun sei hanesan ho TL, nune’e ha’u hanoin kriteria ne’e tenki desidi husi povu TL, la’os husi lideransa ASEAN ninian,”haklaken Amalia. Ves

Jornal Nacional

Sem comentários: