TIMOROAN LABELE HALUHA NIA HUN NO ABUT

Lider nasionál 1975 Dr. Abílio Araújo, fó hanoin ba Timoroan hotu, liu-liu joven sira atu lebele haluha ninia kultura no identidade, nune’e bele hatene ho loloos hun husi istoria nasaun ne’e nian.

“Konaba ita nia memória, ha’u hakarak hateten de’it katak, ita labele haluha ita nia kultura no identidade, ita ne’e se? ita mai husi ne’ebé? No ita atu ba ne’ebé? Ita kuandu koalia memória iha 1974, iha tempu ne’ebá ha’u ho maluk kamarada sira, ami hamutuk buka hatene uluk istória, ne’ebé mak iha tinan atus lima liuba, kolonialismu sira mak ukun ita, maibé ita nia avo sira komesa luta. Tamba ne’e, luta ne’e la’os ami jerasaun 1974 mak hahú, ami ne’e kontinuador de’it, no jerasaun ne’ebé tuir ami ne’e mós kontinuador de’it. Tantu ema sira hahú funu ne’e mai husi ita nia beiala sira,”esplika Abílio Araújo ba JN-Diário, Kuarta (17/08), wainhira partisipa iha II Conferência Internacional e Identidade ba terceiro dia iha Centro Convenções Díli (CCD).

Dr. Abílio reforsa katak, beiala sira ne’e mak hahú duni rezisténsia, maski kilat laiha, iha de’it dima, surik no rama, maibé sira la hakiduk no foti ulun nafatin hodi luta kontra okupantes estranjeiru sira, bainhira sira sama ain iha rai no tasi Timor nian.

“Ohin ne’e mós ha’u dehan, haree didi’ak husi 1974 programa ne’ebé ami halo iha 1974, ohin ba ha’u, sei atual hela, buat barak ne’ebé ami hakarak halo bainhira Timor ukun rasik-an, seidauk hotu. I buat ida mós ha’u dehan importante mak ne’e, ita tenki haree, independénsia polítika hetan tiha ona, maibé ita nia identidade ne’e iha ne’ebé?

Dr. Abílio Araújo fundamenta katak, bainhira koalia konaba memória, tenki hanoin katak, luta ne’e la’os hahú husi 74, la’os hahú husi avo Xavi, Prezidenti Nicolau, i depois kontinua fali husi maun Xanana, tantu sira ne’e mesak kontinuador hotu. Maibé importante liu mak labele haluha abut no hun Timor nian, uma lisan no beiala sira ne’ebé uluk hahú luta. Tamba sé haluha tiha abut no hun, Timor bele lakon ninia identidade. Tamba ne’e tenki konta loloos istória ba jerasaun foun sira atu nune’e sira bele hatene hun husi istória loloos TL nian.ías

Jornal Nacional