Governu Timor-Leste Tulun Euro Miliaun 2 Ba Portugal

DILI,  (ANTIL)  –  Governu Timor-Leste fó tulun osan euro milaun 2 ba Portugal, hodi ajuda governu Portugués tanba kauza hosi ahi han rai ho uma.

Governu Timor-Leste, desidi fó tulun ida-ne’e, liu-hosi Governu nia rezolusaun hafoin reuniaun Konsellu Ministru extra-ordinariu iha Palasiu Governu Dili, Kuarta, (10/8/).

Tulun ida-ne’e atu reforsa Governu Portuguesa nia kapasidade hodi fó resposta no kombate ahi han rai ho uma, inklui tulun ba sukoru sira hodi ajuda populasaun ne’ebé afetadu.

Total hosi 2 miloens euro ne’e governu koloka ba apoiu sira hanesan, 750.000,00 euros apoiu direta ba populasaun ne’ebé hetan sofrementu ahi han uma, no 1.250.000,00 euros hodi tulun autoridade Portuguesas no reforsa autoridade sira-nia kapasidade hodi kombate ahi han rai ho uma.

Apoiu osan ida-ne’e , intrega ona diretamente hosi Ministru Negosiu Estranjeirus Timor-Leste, Hernâni Coelho ba reprejentante embaxadór Portugal iha Timor-Leste, Lúis Cunha iha MNEK Praia dos Queqeiros, Kuarta, (10/8) loraik.  (editor: Otelio Ote)

Foto: Ministru Negosiu Estranjeiru no Koperasaun, Hernâni Coelho reprejenta governu TL, Kuarta, (10/8) iha MNEK Praia dos Queqeros, intrega ajudus ba governu liu-hosi reprejentante governu Portugués iha TL, Luís Cunha. Foto ANTIL/Antonio Gonçalves