terça-feira, 23 de agosto de 2016

Governu Halo Kontratu Foun ho Pelican Paradise


DILI, (ANTIL) – Governu liu-hosi enkontru extra-ordinariu Konsellu Ministru iha loron 21 fulan-Novembru 2014 liu-ba, halo kontratu foun ho kompañia Pelican Paradise hodi harii otel fitun lima entre Tasitolu no Tibar.

”Asina ona memorandum ho governu, atu halo ótel iha área Tasitolu mais la-inklui área ne’ebé tinan-tinan governu selebra serimonia boot sira hanesan isar bandeira ou serimonia sira seluk nomos fatin ne’ebé Amu Papa mai halo misa ba”, Sekretáriu Estadu Terras no Propriedades, Jaime Xavier Lopes ba ANTIL foin lalais ne’e iha ninia serbisu fatin.

Kontratu ne’ebé uluk halo ona konsidera invalidu, nia dehan, agora kontratu foun no dadus sira ne’e sei foti fila fali ba komunidade sira ne’ebé hela iha área ne’eba.

Kompañia ne’e mai Timor atu harii ótel desde kuatru governu, mais la-realiza, entaun kintu governu kompañia ne’e mai fali. ”Dadus ba ema sira ne’ebé okupa rai ne’e iha hotu ona desde 2008, agora aumenta tan ema barak, ne’e problema”, katak nia.

Nia husu hodi fó hanoin ba maluk sira iha teritoriu tomak katak, Timor ukun rasik-án ona, asuntu ruma ne’ebé relevante ho rai, hakbesik-án ba edifisiu Sekretaria Estadu Terras no Propriedade hodi husu informasaun kona-ba rai, nune’e labele hamosu problema iha loron ikus.

Proposta ne’ebé aprejenta hosi Sekretáriu Estadu Apoiu no Promosaun Setór Privadu hetan ona aprovasaun hosi KM.

Pelican Paradise Holdings Timor-Leste, ninia sede iha Singapura sei halo konstrusaun no esplorasaun ho investimentu osan dólar millaun 310. Projetu otél ho kuartu 492, jináziu, restaurant, spa, sentru konvensaun ne’ebé bele simu ema rihun ida atus lima, kampu golfe, zona komersiál no zona rezidensiál.

Faze harii otél ne’e, investidór kalkula, sei loke fatin servisu diretu hamutuk rihun ida atus lima, hodi pursentu 70 to’o 80 Timor-oan mak sei prense. Nune’e mos, kuandu konstrusaun remata no funsiona ona, investidór preve atu kria tan fatin serbisu 830, ho pursentu 70 to’o 80 Timor-oan mak sei prense. (jornalista: Rita Almeida)

Foto: Parte balun hosi planu konstrusaun ótel ne’ebé sei harii hosi Pelican Paradise. Foto repro youtube

Sem comentários: