FP 10 AMEASADU MULTA FALI ESTADU NIA OSAN

Funsionariu Públiku (FP) nain 10 ameasadu  sei selu  fali Estadu nia osan  ne’ebé maka sira simu durante sira servisu hanesan Asesor iha institusaun Estadu.

“Por volta ema  nain 10 maka   ita deskonfia, agora   tama  ona  iha prosesu  ida  atu hasai nota de kulpa ba sira, kuandu  ita iha dadus hatudu ona katak,   iha,”esplika Komisariu  Komisaun Funsaun Públika (KFP), Olandina Caero, ba   jornalista iha Palasiu Governu, Tersa (16/08).

Kona-ba sansaun, Olandina Caero dehan,  KFP la haree ba krimi, maibe KFP haree ba ema ninia komportamentu, haree ba administrativamente nia kontra ka lae.

“Agora  buat ida  ne’ebé maka KFP halo maka  ne’e, depois hetan tiha evidensia hatun sansaun ba sira, obriga mos sira, tanba  lei fo fatin obriga  sira atu fo fila fali Estadu nia osan  ne’ebé sira la merese, depois  inkaminha ba Ministerio Publiko. Depois MP maka hare’e  determina  iha ka lae, krimi ruma  iha ne’eba,”Olandina Caero.

Nia dehan, agora foin maka hahú, labele to’o tinan rua  atu  nune’e bele fo sai ba públiku katak  afinal  iha duni ema  halo  servisu dobru  hodi simu  osan Estadu  iha fatin rua  ne’ebé lei la preve.

“Ha’u  hakarak hateten  50%  la’o ona, entaun ita seidauk  bele koalia sai  ka ita seidauk  bele fo hatene sai enkuantu  ita seidauk iha rezultadu   ne’ebé maka klaru, KFP lakohi koalia temi  enkuantu seidauk hetan klaru, mas 50% komesa hatudu ona evidensia,”dehan Olandia Caero.

Iha  parte seluk, Diretor Inspektor  Jeral Estadu, Francisco Carvalho hateten,  kona-ba  FP sai asesor hodi simu salariu dobru husi Estadu ne’e agora dadauk iha KFP nia liman.

“Ha’u  hanoin sira haree-to’ok  iha ne’eba, tanba  kompetensia KFP ninian sira seidauk em caminha mai, maibe nain 10 ne’e los duni,”dehan Francisco Carvalho.

Nia dehan, tuir  lolos  ne’e FP labele sai fali asesor  hodi  simu salariu rua. “Se  nia  hakarak sai asesor nia tenki rezigna-an tiha  husi  servisu FP ne’e. Atu fo sansaun ba FP sira ne’e, sei haree lai  ninia kontekstu  ne’e halo nusa. Por ezemplu nia uluk sai hanesan Diretor iha fatin ida nia xefia  depois nia ba servisu fali iha fatin ida seluk, maibe nia  prosesu ne’e seidauk  remata  katak, ne’e adia ajustamentu nia salariu  ne’e devolve fali mai.   Ne’e duni, falha  iha prosesu administrative ida,  mas kuandu  nia hatene hela taka lia ba malu ne’e, buat ida bolu  futu lia hamutuk  depois hodi hetan benefisiu   ne’e prejudika orsamentu Estadu nian,”dehan Francisco Carvalho,”dehan nia.avi

Jornal Nacional