Federasaun Atletizmu Preukupa Orsamentu Ba Dili Marathon Internasional

DILI (ANTIL) - Federasaun Atletizmu Timor-Leste preukupa ho orsamentu atu halo preparasaun ba Dili Marathon Internasionál , ne’ebé atu realiza iha Dili, 9 Outubru tinan ne’e.

Lamentasuan ne’e tanba to’o ohin-loron governu liu-hosi Sekretaria Estadu Juventude no Desportu seidauk aloka  orsamentu ba preparasaun  ba Federasaun Atletizmu.

“Ida-ne’e impaktu boot no trava buat barak. Governu duni tempu atu ezekuta de’it osan, maibé kualidade sei lá garante,” Prezidenti Federasaun Atletizmu Timor-Leste, Afrânio Xavier Amaral dehan ba ANTIL iha sede Federasaun Atletizmu, Jináziu Dili, foin lalais ne’e.

Tuir nia hanoin, Dili Marathon Internasionál ne’e hanesan Governu nia eventu permanente. Tan ne’e, tenki koloka osan ba eventu refere tinan lima nian kedas, atutinan-tinan lalika ulun moras.

“Ida-ne’e maka fó impaktu boot ba dezenvolvimentu desportu nasionál. Tanba ne’e, hakarak ka lakohi, Governu tenki kria polítika di’ak ida. Nune’e ita labele problema tan ho tempu no orsamentu,” Afrânio informa.

Atu hasa´e atleta sira nia prestasaun, nia hatutan,  governu tenki kria programa sistemátiku,  inklui apoiu nutrisaun ne’ebé maka di’ak.

“Sé sira (atletas) lor-loron treinu, maibé hahan lá di’ak, bele dezastre ba sira-nia saúde,” Afrânio dehan. (Jornalista: Xisto Freitas)

Foto: Afrânio Xavier Amaral