segunda-feira, 11 de julho de 2016

PRO OTONOMIA HUSU REKONSILIASAUN, PR TAUR LAKOHI HAMOSU PROBLEMA FOUN BA POVU


Timor-oan pro otonomia sira ne’ebé oras ne’e dada’uk sei hela iha Indonesia hato’o proposta mai Estadu Timor Leste (TL) hodi husu rekonsiliasaun atu sira bele fila hikas mai TL.

Maibé Prezidenti Repúblika (PR), Taur Matan Ruak responde proposta ne’e hodi hateten katak, rekonsiliasaun ne’e presiza tempu, tanba Xefi Estadu ne’e lakohi atu hamosu fali problema foun entre povu TL ho Timor-oan sira ne’ebé mak sei iha Indonesia.

Prezidenti Repúblika, Taur Matan Ruak dehan, ideia Timor-oan sira ne’ebé oras ne’e dada’uk sei iha Indonesia ne’e, di’ak tebes, maibé presiza tempu.

“Prezidenti Repúblika dehan katak, ami lori imi mai, keta halo fali problema ida iha ne’e, problema ne’e mak, nia mai hakarak foti fali nia uma, iha ne’e lakohi fó,” informa Eis Prezidenti Camâra Dili iha tempu Indonesia nian, Mateus Maia ba jornalista sira iha Palacio Prezidensia Aitarak Laran Dili, Sesta (08/07).

Tanba ne’e, Taur Matan Ruak dehan,tenki haree didi’ak problema ne’e, no buka dalan oinsa mak labele hamosu fali problema foun entre povu iha ne’e, ho sira ne’ebé mak atu mai.

Tanba Timor-oan pro otonomia ne’ebé mak oras ne’e dada’uk se iha Indonesia ne’e, husi Munisipiu 13 iha Timor laran tomak.

Maibé Mateus relata ba PR Taur katak, rekonsiliasaun ne’e, katuas lia nain sira husi Timor-oan sira iha Indonesia ho lia nain sira iha Timor Leste tu’ur hamutuk hodi halo juramentu ba malu.

“Juramentu ne’e hatete katak, aban bainrua ita labele halo tan ona ka hamosu fali problema foun, i Governu bele toma inisiativa hodi bolu Indonesia mai, Portugal mai, PBB mai hodi sira sai sasin katak, ba oin ami dame, laiha tan problema ona,” katak Mateus.

Nia haktuir, ho juramentu ne’e, Governu bele hamosu lei ida katak, Timor-oan sira ne’ebé mai ne’e, iha direitu hanesan ho sidadaun sira ne’ebé iha Timor Leste.

Maibé Mateus dehan, rekonsiliasaun ne’e, hanesan proposta de’it husi Timor-oan sira ne’ebé mak agora dada’uk se iha Indonesia, kuandu Estadu Timor Leste lasimu hodi halo rekonsiliasaun, ida ne’e Estadu nia direitu, maibé Timor-oan sira iha Indonesia mós iha direitu atu hato’o sira nia hakarak.cos

Jornal Nacional

4 comentários:

Unknown disse...

Makuk sira hotu,Maromak halo ema atu sai nain ba mundu nee, hodi ukun sasan iha rai, iha tasi no mos iha lalehan. No mos Maromak foo liberdade ba ema atu hili opsaun: diak tuir ema nia hanoin no ida seluk ladiak tuir ema nia hanoin. HILI OPSAUN nee direitu ida, DIREITU UNIVERSAL. Hili opsaun laoos krime. Hili UKUK'AN laoos krime,no hili AUTONOMIA mos laoos krime. Maiori hili UKUN'AN no minoria nebe hili autonomia tenki hakruuk no submete ba desizaun maioria nian. Nee mak demokrasia hanorin. TL nudar Nasaun ba timor'oan hotu, sira nebe iha rai laran no sira nebe hela iha rai liur. Hanin ida atu halo rekonsiliasaun nee povu kiik sira, kibit laek no mukit sira.sira nebe sei hela iha tenda okos.katak maioria esmagadora/tertindas sra nee mak bele halo rekonsiliasaun. Ba ema sira LIMAN'RAN, hallo genosidiu, ba ema sira nee sei lahalo rekonssiliasaun, sira tenki ba hatan sira nia sala iha tribunal.

Bel-Loi Filipe disse...

Sei la fasil atu koalia, sei la fasil atu rekonsilia, basa istoria halo laran kanek, istoria halo laran ksolok, maibe buat hirak ne'e hotu sei lataka dalan ba ita atu simu malu.
presija mak desijaun atu hili, tenke responsabiliza ba desijaun iha futuru.

Unknown disse...

Hau simu no aseita ho lifuan paragrafu ikus nian nebe hato'o husi ita nia belun Mateus, nebe nia hateten katak ne'e hanesan proposta deit husi Timor oan nebe sei hela iha Indonesia. Nebe diak liu, estadu Timor Leste bele foti desijaun didiak atu la bele ha mosu konflitu foun. Tanba Nasaun se la hakmatek, odi malu nafatin. Biar ita nia maun alin sira hela no hakuak nafatin sira nia nasaun doben iha Indonesia. Buat akontesimentu hanesan ne'e mak sai historia bo'ot ba sira nia oan iha futuro.

Ho mensajen badak deit ba Ukun Nai'in sira iha Timor Leste, hodi tetu no tais didiak, tamba maluk sira nebe mak uluk hili integrasaun ho Indonesia sira mak laran makerek ba rai doben Timor Leste. Sira mak sai traidor no oho maun alin nebe uluk hakilar atu ukun an.

Hein komentariu ikus tan.

Unknown disse...

sira timor oan hotu mos sira laia direito par mai fali timor...uluk fo opsaun rua sira hili otonomia...depos oho ema, estraga ema, sunu ema nia uma...agr mak hakarak mai fali...
sira atu mai ne hanoin didiak no husu ba guverno mos tenqui tetu halo didiak...agora dadauk problema povo iha rai laran mos sei moris terus hela e resolve cdauk hotu. tan ne ami husu ba nai ulun bot sira atu foti desizaun tenqui tetu halo didiak lai...
se sira mak mai duni ntao problema sempre iha. abraco