PR TAUR: “HA’U MAK PM, OSAN KO’A HOTU”

Prezidenti Repúblika (PR), Taur Matan Ruak hateten katak, aban bainrua nia mak sai Primeiru Ministru (PM) karik, Orsamentu Estadu kada tinan ne’ebé laiha benefísiu ba povu, nia sei ko’a hotu, no orsamentu ba projetu bo’ot sira ne’e mós sei hamenus.

“Sira ne’ebé la fó ha’u ne’e, sira nia interese saida, sira uza ida ne’e ba polítik? Sira hatene katak, keta aban bainrua ha’u mak sa’e fali, ha’u la fó ba sira karik nusa,” katak Taur Matan Ruak ba jornalista sira iha Suku Faturasa, Postu Administrativu Remexio, Munisipiu Aileu, Kuarta (27/07),  hodi hatan kona-ba lideransa balun ne’ebé husu ba Parlamentu Nasionál (PN) atu hamenus Prezidenti Repúblika (PR) nia orsamentu iha tinan oin, tanba PR Taur utiliza Orsamentu Estadu ba interese seluk.

Taur Matan Ruak hatutan katak, sé Prezidenti nia orsamentu mak sira ko’a tiha mós laiha buat ida, Prezidenti sei la tanis, tanba osan ne’e la’os Prezidenti Repúblika nian.

Xefi Estadu ne’e haktuir, kuandu orsamentu kada tinan ne’e mak Prezidenti Repúblika nia osan privadu, entaun Prezidenti bele rekere, maibé osan ne’e, povu nian.

Tanba ne’e, Taur Matan Ruak husu ba lideransa sira hotu atu labele halo jogu polítika arbiru, tanba osan ne’e, la’os umane no mane foun, ida ne’e liga ba nasaun.

“Sá tan liga ho Prezidenti ida ne’ebé halo funu tinan 24,” Taur Matan Ruak esklarese.

Nia hatutan, povu ho Governu iha relasaun ida ne’ebé do’ok tebes, tanba povu lahatene atu ba ne’ebé lós, no povu nia hanoin ne’e, negativu lós.cos

Jornal Nacional